BJP Mizoram pradesh thalaiin Mizorama sorkarna chelh mek MNF party chu sorkarna chelh zui zel tlaka an ngaih loh thu an sawi.
Sorkarin Covid dona hmanrua a mamawh em em ramdang aṭanga chawkluh ngai lova Mizorama puan ṭhuia eizawngte tana inhlawhna tur sorkarin a siamsak chu an lawm hle laia, an harsatna belhchhahtua Mizoram sorkar a ṭang leh si chu pawi an tih thu BJP thalai chuan an sawi a. “SEDP sem tur an neih chuan PPE kit ṭhui man hi chu an nei turah kan ngai a ni” tiin, a rang thei ang bera PPE ṭhui man pe turin Mizoram sorkar an ngen.
Mizoram sorkarin sum-ah harsatna lian tak, chinfel hleihtheihloh khawp harsatna a tawk mek nia sawiin, BJP thalai chuan hei hi sorkar hlawhchhamna a ni tih a chiang niin an sawi a. Sorkar hnathawkte hlawh leh GPF te, pension ten an pension-a chhuak ten an chhuahpui tur sum an la theilote, health care ba tam lutuk te bakah bill tang reng te chuan sorkar chu sorkar awmze nei lo leh Mizoram enkawl tlaklo an nih zia a tichiang niin an sawi.
BJP thalai chuan sum harsatna kawnga mawhphurtu ber chu Finance minister a nih vangin a department chanah harsatna lian tak a thlen avangin minister ni zui zel tlaka an ngaih loh thu pawh an sawi a. Mizoramin hmasawnna kawng a zawh theihna tura inthiarfihlim ngam tura an ngen thu an sawi bawk.