Central YMA-in an ngen angin Mizoram sorkarin Myanmar atanga dan lova kuhva rah tawlh ruk dan nan a tiluite lo manna turin Sihhmui leh Serchhip daia Sailiamkawnah check gate a siam thar a, Sihhmui check gate-ah police an duty tan.
Sairang Zero Point thlen thlak hma, Sihhmuia Mizoram police check gate siam thar hi Thawhlehni tlai khan Central YMA hruaitute leh Mizoram police hotuten an tlawh a. He check gate-ah hian Thawhlehni zan atangin Sairang police an duty tan a ni.
Sihhmui Check Gate tlawhtu, Central YMA President R Lalngheta chuan dan loa kuhva rah tawlh danna atana check gate rintlak tak siam tura sorkar an ngenna rang taka tihhlawhtlin a ni ta chu lawmawm a tih thu a sawi.
Central YMA General Secretary Prof Lalnuntluanga pawhin thu sawiin, “He sumdawnna dik lo tak tihtawpna kawnga Mizoram police hmalakna hi YMA-in a thlawpin hma a lakpui tlat dawn,” a ti.
DIG (Hqtr) Lalbiakthanga Khiangte chuan check gate kalphung tur sawiin, a vil tura Sairang Police Station ruat an nih avangin thawktu pawh an pek belh a ni tih a sawi a, check gate chu changtlung zawka la thuam belh zel an tum thu a sawi bawk.
Tar lan tawh thin angin, January 19, 2022 khan Central YMA hruaituten Cheif Minister Zoramthanga kawmin dan loa kuhva rah tawlh dan nan check gate mumal tak siam turin an lo ngen tawh a. Hemi hnu, February 4, 2022 khan Home Minister Lalchamliana leh police hotute nen hmalak dan tur hi an duang ho leh a ni.