Auto Corner
by Ruata
Kia Carens tlangzarh ta
South Korea company Kia chuan India ramah an MPV thar, kan lo tarlan thin tawh Carens chu Rs. Nuai 8.99 – 16.99 (ex-showroom) man turin an tlangzarh fel ta.
Lirthei pianphung leh thildang
Kia Carens hi Kia Seltos platform nghahchhana duan a ni a, hetihrual hian Seltos aiin 225mm in a sei thung a ni. A lirthei sei zawng mai bakah hian Kia Carens hi Seltos wheelbase aiin 160mm in a sei zawk a. A lirthei hmelhmangah pawh hian Kia chuan Seltos nena khaikhin pawha danglam deuhin an duang bik a. ‘Recreational vehicle’ tia a company pawhin an koh Kia Carens hi Multipurpose Vehicle (MPV) huanga dah theih tur ni mahse SUV hmelhmang leh pian pawh a nei tel a. Lirthei tangkai leh nuam taka mihring phur tam thei tur, mawi bawk si ti ila a dik viau awm e.
A chhunglamah chuan Kia Carens hi standard-ah chuan mi 7 chuan theihna tur a ni a. A man to hoah mi 6 chuan theih, a tlar laia seat hrang thut nuam tak, mi pahnih chuan theihna kan hmu a. Mi 7 chuan theihna pawh hi a chhung a zau that avangin nuam takin mi 7 an chuang thei dawn a, a tlar hnung bera chuang tan pawh an ke dahna a chep lo viau bawk a ni.
Kia Carens hi trim level panga – Premium, Prestige, Prestige Plus, Luxury leh Luxury Plus te a awm a. Heng variant zawng zawngah hian a man tlawm ber pawh ni se air conditioner vent tha tak a awm vek a. Hei bakah hian one touch electric assisted tumble function chu a tlar hnung bera luh dawnin hmeh keuh tur a awm bawk a ni. A man sang hoah hian kentel tha lehzual, auto climate control, 10.25 inch touchscreen connected car tech awm tel, keyless go, cruise control, ventilated front seat, wireless phone charging, rear view camera leh thil dang dangte a awm.
Kia hian himna lam pawh a ngaipawimawh hle a. Himna hmanraw changkang hrang hrang – airbag paruk, ABS, ESC, hill start leh descent control leh tyre pressure monitoring te a awm a ni. Kia company in an tarlan danin Carens hi mi 19000 chuang hretin an book lawk tawh a, booking hi thla hmasa thla chanve chho atang khan an lo hawng tawh a ni.
A khawl leh thildang
Kia Carens-ah hian khawl chi thum duhthlan tur a awm a. 115hp power pechhuak thei 1.5 litre naturally aspirated petrol khawl leh a aia chak zawk 140hp power pechhuak thei 1.4 litre turbo petrol khawl chu petrol hmang bikah duhthlan tur a awm a. Hei bakah hian 115hp power pechhuak thei 1.5 litre diesel khawl a awm bawk.
Transmission lamah chuan 6 speed manual hi khawl pathumah hian a awm a. Turbo petrol leh diesel ah hian automatic gearbox duh tan duhthlan tur a awm bawk a. Turbo petrol ah hian 7 speed dual clutch auto duhthlan theih a awm a, diesel ah hi chuan 6 speed torque converter automatic a awm bawk a ni.
Turbo petrol leh diesel khawl hi variant hrang hrangah hian a awm vek a. 1.5 petrol hi Premium leh Prestige ah chauh a awm a ni. Diesel automatic hi Luxury Plus ah chauh duhthlan tur a awm thung a. Turbo Petrol DCT hi Prestige Plus leh a aia sang hoah a awm thung a ni.
Kia chuan petrol hmang Carens hian petrol litre khatin km 16.5 a tlan thei a. Diesel hian litre khatin km 21.5 a tlan thei thung a ni. Mizoramah hian Kia lirthei, an SUV pahnih Sonet leh Seltos hi tam tak a awm tawh a. A aia lian leh chuan nuam, lirthei tangkai tak tur Carens hi mi tam takin an duh leh viau a rinawm.