Delhi chhuah lam Gurugram-a rel kawng siam lai mek pakhata Selfie lak laia chetsualna thlengah mi pali chu Rel-in a su-hlum nia hriat a ni.
Government Railway Police (GRP) tarlan danin, thawhlehni tlai dar 5 vel khan Ajmer pana tlan Jan Shatabdi Express-in a rawn hnaih tawh hle tih hrereng mah se, kum 18-21 inkar tlangval pali te hian selifie lak an thulh chuang lova, Rel tlan lai tihlan an duhna lamah insaseng hman lovin khawvel an chhuahsan.
Tlangval pali te hi Sameer (19), Mohammad Anas (20), Yusuf alias Bhola (21) leh Yuvraj Gogia (18) an ni a, Devilal colony-a cheng an ni.
Police sawi danin, an zingah hian pawl 9 zirlai pakhat awmin, pakhat dang hi mobile dawr-a thawk a ni thung.
Thil thlen dan hi chhui nghal niin, Rel khalhtu hnen atanga information an dawn veleh police te hi an chechhuak nghal a ni.
A tlangpuiin, heti anga thihna thleng hi Railways lam chuan ‘Rel accident’ ah ngai lovin, a tuartute hi ‘trepassers’ an ti thin.
Ram dang ang bawkin, India-ah selfie lak laia chetsualna thleng a tam malh malh hle.