Russia nena inepna boruak rit tak hnuaiah Alina Pash chuan an ram Ukraine aiawha Eurovision Song Contest atangin a hnukdawk ta tih a sawi.
Kum 28 mi hian he event-a inlan thei turin an ram TV show-ah hnehna chang mah se, rilru hreh-awm leh harsa takin tel loh mai a tithlu ta a ni.
Hetih lah hian Russia-in 2014 kuma Ukraine ram bung khat Crimea a hneh-chhuh hnu kumleh maia he lai bial a lo va tlawh kha tunah hian chhui mek zel a ni a, mi tam tak chuan Ukraine dodalna angah hmuin, hnam phatsantu ang hialah an ngai a, hrehawm pawh a ti hle.
Instagram-ah, “Ukrainian khua leh tui ka ni a, Ukraine Dan ka zawm a, kan hnamzia leh hlutna te thlengin khawvel hmaah ka phochhuak thin,” a ti.
Crimea a tlawh khan tun thleng hian boruak tha lo a nei chhunzawm zel a, Russia-in Ukraine a run mai ang em, tia khawvelin thin phu det deta a thlir lai mekin Alina pawh hian a nghawng a tuar chhunzawm zel a ni ber. Hun harsa tak a hmang.
Russia-in Ukraine ramri atangin a sipai tha-hnem tak la chhuak tawh anga a sawi chu, US leh NATO lam te’n dawt maiah an puh a, indo lian tham chhuak thei reng dinhmun ah an la ding reng a ni.