Afghanistan-a mipa naupang, tuichhunchhuaha ni li zet tang chu lak chhuah theih ni mah se a nunna erawh chhan hman a ni lo.
Zirtawpni chawhnu khan chhanchhuah hna thawktute chuan chhun zan zawma an beih hnuah mipa naupang kum li mi, Haider tia an sawi hi an la chhuak.
Tual chhung chanchinbumi pakhat chuan chhim lam, Zabul province-a naupang an lakchhuah hian nikhua a hre tawh lo va, thawk pawh a lo thaw tawh lo niin BBC hnenah a sawi.
Chhanchhuah hna thawktute hian Ningani atang khan tuichhunchhuah chhung atang hian thawm hriat tur a awm tawh lo tan niin an sawi.
Rescue team hian naupang tanna lai thleng tur hian nasa takin an lai a. Lak chhuah a nih veleh hian helicopter hmangin Kabul-a damdawi in panpui nghal ni mah se an chhan hman ta lo a ni.
“Lak chhuah hlim hun reilo te chhung kha chuan a la thaw a, damdawi thiamten oxygen an pe nghal a ni,” tiin Zabul police thupuangtu, Zabiullah Jawhar chuan AFP a hrilh a. “Medical team-in helicopter-a an chuanpui dawn laiin a nunna a hloh ta a ni,” a ti.
Zabul-a information & culture department-in BBC Pashto hnena an sawi dan chuan Haider-a hi Thawhlehni khan Shokak khuaa kawngpui kama tuichhunchhuahah hian a tla palh.
A tlakna khur mawng, metre 25 zeta thuka a lut thla a, a zim em avangin chet pawh a che sawn thei lo va. A tir lamah hrui hmanga pawh chhuah tuma beih a ni a, hei hian lak chhuah a tiharsa zual a ni.
Tuichhunchhuah ko atanga metre 10 vel thleng pawh chhuah a nih hnuah a zim em avangin a tang a. Chhanchhuaktuten heta a tanna an thlen hma darkar 30 vel zel a awm a, a awmna lai hi tui leh ei tur pawh pek theih lohna lai a ni.
Video thehdarh pakhatah chuan a pain, “I tha em ka fapa? Min lo chhang teh, tap suh, la chhuak tur chein kan bei mek e,” a ti a. Naupang pawh hian, “Ka tha, ka chhang ang che,” tiin a chhang let lai hmuh tur a awm.
An lak chhuah theih hma darkar 24 vel atangin thawm a nei zui tawh.
Taliban interior ministry senior adviser Anas Haqqani chuan, “A pawi kan ti a, Haidar-a chu kan hnen atangin kumkhuaa lak kian a ni ta,” tiin Twitter-ah a tar lang.
Chawlhkar hnih liam ta maiah khan mipa naupang tho, Morocco-a mi chu ni li zet tuichhunchhuaha a tan hnuah thia lak chhuah a lo ni tawh bawk.