Kum tam tak hnua thlipui leh ruah thawk na ber, Storm Eunice an tihin UK a nuai tan avangin mi maktaduai tel chu pawn chhuak lo tura tih an ni.
An tihchhuah khât tak, red weather warning pek chhuak a ni a, hei hi thil chhia leh thlawkin mi a tihnat theih avanga pek thin niin Met Office chuan England chhim leh khawchhak lam bakah Wales chhim lamin an tuar dawn niin an sawi.
Isle of Wight-ah chuan thli chak zawng chu darkar khata mel 92 zet a tling tawh.
Sikul tam tak khar a ni a, zin veivahna hmanrua pawh chawlin tam tak chu an zin tur thulhtir an ni.
England chhimthlang leh Wales chhim lamah chuan power lakna a chhiat nasat em avangin in tam takin power an nei thei lo.
BBC Weather chuan Eunice hi ‘kum 30 chhunga thawk na ber tur’ niin a sawi lawk.
Eunice hi chawlhkar khat lek chhunga UK-in storm an tawrh pahnihna tur niin a hma lawk khan Storm Dudley an tih chuan Scotland hmun thenkhat, England hmar lam leh Northern Ireland a nuai a, chhungkaw sang telin power an neih loh phah.
Red weather warning pek hi a khât hle a, hetiang pek a nih chuan thliin in chung a hawk te, power line chat te, thingkung tlu leh thil dang thlawk, nunna atana hlauhawm a awm thei tihna a ni.
Kum 2008-a hetiang system an siam atangin tun tum hi London leh England chhimchhak lama red warning pek hmasak ber tum a ni.
Red warning pek hnuhnung ber chu nikum November-a Storm Arwen a thawh tum kha a ni a; mahse, hemi hma lam, kum 2018-a ‘Beast from the East’ an tih mai a thawh hnuah an awl zui reng ta thung.
BBC Weather meteorologist Ben Rich chuan Eunice hian ‘chhiatna nasa tak, nunphung nasa taka tibuai leh tuipui kam vela tui lian’ a thlen thei dawn niin a sawi a; mahse, eng ang chiaha nasain nge chhiatna a thlen dawn tih erawh a sawi lawk ngam lo.
“Hetiang vel chiaha thlipui chak hian UK hmun hrang hranga thil a tihchhiat dan a inang lo thei hle a. Entir nan, England chhim lam laili ai chuan Scotland khawthlang lam vaukamah darkar khata mel 80-a thawk tur lo hmachhawn tura inbuatsaih that a ngai daih zawk dawn a ni,” a ti.
BBC Wales weatherman Derek Brockway pawhin Eunice hi hurricane ni lo mah se a thlipui ken chu hurricane ang vela chak a ni thei tih a sawi.
Red warning hi Devon, Cornwall leh Somerset leh Wales chhim lam vaukam huam chinah Zirtawpni zing dar 7:00 leh chhun dar 12:00 inkar khan puan niin thlipui darkar khata mel 90 thleng thawk theia sawi a ni.
Hmun thenkhata red warning bakah hian London, England chhimchhak leh England khawchhak lamah chawhma dar 10:00 leh tlai dar 3:00 inkar thli na tak tleh tura sawi lawk a ni bawk.
Amber warning an tih chu England chhim lama Manchester leh Wales-ah zan dar 9:00 thlen pek niin thlipui darkar khata mel 80-a chak thawk thei a ni.
Yellow chu Scotland, Northern Ireland leh England hmar lamah zing dar 3:00 leh tlai dar 6:00 inkar pek a ni a.
Yellow warning-ah hian Midlands, England hmarchhak leh hmarthlang, Northern Ireland leh Scotland hmun thenkhatah thli thawk thei niin an sawi.