Sumdawng pawl, Mizoram Merchant Association (MIMA)-in ILP pek chhuah kawngah home department-a a buaipuitute fimkhur leh zual se tha an tih thu an sawi.
MIMA chuan ILP sponsor-tu Mizo hming chhui hleihtheih loh leh contact number thi tawh/number dik lo dah an awm fo niin an sawi a. Address chhui zui tlak loh awm thinte chu lo hnawl thin tur leh ILP pe chhuak lo tura an duh thu an sawi.
Kum hnih dam ILP pawh dan ang tak chuan neih hleihtheih loh a nih laiin, nei an awm nual tawh niin MIMA chuan an sawi a. ILP pek tawha felhlel awmte chhui chianga enzuia cancel-sak turin a mawhphurtute an ngen a. “ILP hi Mizo hnam leh ram kan himna a ni tih hriain Mizo tawh phawt chuan kan mawhphurhna a ni tih hriain i vawnghim tlat ang u,” an ti bawk.
COVID19-in an eizawnna kawngah harsatna a thlen nasat avanga an mangan thu chief minister leh dy. chief minister hnena an thlen hnua an harsatna sukiang tura hmalak a nih avanga an lawmthu pawh MIMA chuan an sawi a. Hri leng kara fimkhur taka eizawnna hna an chhunzawm theihna tura ruahmanna siamsak an nih avangin an lawm hle tih an sawi bawk.