Ajax Amsterdam chuan an plaryer hlui Abdelhak Nouri chhungte hnenah Euro maktaduai 7.85 an pe dawn.
Dutch champion hian kum 2017 a pre-season inbuatsaihna inkhelah Werder Bremen nen an inkhelh laia nikhaw hre lo a tlu Nouri chhungte hnena sum an pek tur hi an puang a. Nouri hi damdawi in kalpui niin harhchhuak leh mahse a thluak a nghawng hman avangin enkawl zui a ngai.
Kum 24 mi ni tawh Nouri hian kum 2016-17 season khan Ajax Amsterdam first team tan hian a khel \an a, an tan inelna hrang hrangah vawi 15 inkhel hmanin goal khat a khung a. Netherlands Under-21 international a ni bawk.
Ajax hian Nouri tluk hnua khelmual chhunga an buaipui dan a \ha tawk lo tih an chhui chiannaah an pawm a. Nouri chhungte nen hian ‘Arbitration Committee’ hmaah sum inpek dan tur inremna an nei.
Ajax general manager Edwin van der Sar chuan, “Abdelhak leh a chhungte harsatna tawh hi a la kal reng dawn tih kan hria a, club pawhin pawi kan ti hle. A chhungten nitin zantina an buaipui danah club hi kan lawm a. Kei leh Ajax mi leh sa ten kan tlawh apiangin an lo inhawng hle \hin.” tiin a sawi.