Hmangaih kan neih hian hma-ngaih let ve kan phut tur ani angem?
Hmangaihte tan engkim kan huam a, an huam ve lo anih pawhin vui tur kan ni em?
Midangte hmangaih thei tura siam kan ni a, midang te laka hmangaihna beisei hi mahni hmasialna a ni em?
Nun kan pe a, hun kan pe a, kum kan pe a. Min pek ve theihloh avang ngawt a rilru na tur kan ni angem?
Kan hmangaihna ngawt changchawi a, beisei let kan neih hian hmangaihna dik a ni meuh em?
Ka hmangaih luat avangin ka ngen chiam tur a ni dawn em ni?
Keiina ka pek theihloh dam-chhung khaw sak nawmna chu a nei thei anih chuan lawm takin ka thlah mai tur ani dawn lawm ni?
Mahse… Hmangaihtu chuan a hmangaih chu atan nun pek a duh avangin ngen chiam sela dem tur ani bik dawn em ni?
A hmangaihna tem tir a duh avangin chelh tlat sela tunge dem thei ang?
A hmangaih damchhung nun chu hmangaihna a chawmlen a duh avangin kiang duhlo sela dem mai tur a ni dawn em ni?
Damchhung khawsak nawmna leh ropuina pe thei lova hma-ngaihna chauh pek tur neitu chuan kumtluanga kawppui atan sawm sela mahni hmasial a ni bik dawn em ni?
Anih leh, “Hlimte’n i len chuan lawm zel nange” tia rilru na tak chung pawh a thlah theitu hmangaihna nge tak a, “Khawvel nawmsakna leh sum leh paite’n an tihbuai phakloha hmangaihna pek tum tlat tu hmangaihna? Khawi hi nge hmangaihna dik zawk ni ang le.
Hmangaihtu chuan hmangaih chhan a neih chuan, a hma-ngaih chhan chu a chhia emaw, a chuai emaw, a bo emaw anih chuan a hmangaihna pawh a tawp nghal dawn tihna em ni?
Chhan leh vang awm lo a hmangaihtu chuan hmangaih chhan a neih miau loh chuan a tlo bik kher angem?
Hmangaihna dik kan tih fo chu engnge ni ta le? Chhan neia a hmangaih anih pawhin a tlo tur ani, chutiang bawkin chhan leh vang awm lo a a hmangaih anih pawhin a daihrei tur ani.
Hmangaihna tak chu a kawng a ngilin a mam reng fo ngai lo a. Harsatna, manganna, damlohna, lunglenna leh khawharna karah rinawm takin a tuar a, a tawpah mawi takin a parvul thin. Dawhtheihna leh rin-awmna tel lovin hmangaihna a parvul ngai si lo a!