British heavyweight boxer Dillian Whyte chuan WBC heavyweight champion Tyson Fury hmachhawn turin contract a ziak.
Kum 33 mi Whyte hi contract ziak turin Thawhlehni chhun dar 11:30 thleng hun pek a ni a. Kar hmasa a\ang khan indawrna hi ngawrh taka kalpui a ni tawh. Boxer pahnihte hi April 23-ah a inhmachhawn an tinzawn a, Wembley Stadium-ah neih an tum.
A khingpui tur Fury chuan Whyte-a’n contract a ziak tih a chian hnuah social media kaltlangin a chhaih zui a. “Dillian Whyte hian Dollar maktaduai 8 hlawh turin contract a ziak a, a mak hle a ni.” tiin a tih el a. “Thil atthlak tak a ti a, ani hi sawi sawi tham pawh a ni lo. A damchhunga a hlawh hnem ber \um ni turin contract a ziak.” tiin a sawi.
Fury v Whyte – chiang zawkin
Whyte hi WBC hnuaia number one rank contender ni rengin WBC heavyweight title chuh tur a nihna hi a rei tawh a, a hun a inherchhuak hleithei lo \hin.
Fury-a promoter, Frank Warren leh Whyte-a promoter Eddie Hearn te hun rei tak chhung an indawr a, inremna a awm theih loh hnuah January thla khan Warren-a Queensberry Promotions chuan he inelna buatsaih tura an chhanna chu pawm a ni a. Dollar maktaduai 41 in an chhang.
Kum 33 mi ve tho champion lai Fury hian fighter purse a\ang 80% vel a hlawh dawn a, hei hi British Pound chuan maktaduai 20 vel ni tura ngaih a ni a, a bak zawng Whyte-a’n a hlawh ang.
Whyte hian hei aia hlawh sang zawk hi a phut avangin inbiakna a kal rei a, mahse professional boxing a a hlawh san ber \um a ni dawn. A chak zawkin Pound maktaduai 3.1 an hlawh belh leh dawn bawk.
Fury hian kum 2018 August thla hnuah UK-ah boxing match a la nei leh lova. Francesco Pianeta a hneh hnuah US-ah char char la inhnekin promoter Bob Arum-a company Top Rank nen inremna an neih angin America-ah zel a inlan.
Tunge Whyte?
Jamaica a piang feet 6 leh inches 4 a sang Whyte hi a hming lemah ‘The Body Snatcher’ vuah a ni a. Professional boxing-ah vawi 30 inlan tawhin vawi hnih a tlawm a, vawi 28 chakin vawi 19 knockout in a chak tawh.
Kickboxing-ah BIKMA super-heavyweight British title leh European K1 champion a ni tawh bawk.
Kum 2019 khan Oscar Rivas hnehin WBC interim heavyweight title a la a. He title hi Alexander Povetkin lakah kum 2020 khan hloh mahse thla ruk hnuah Povetkin hi knockout in a chhuhsak lehnghal.
Mi tam takin contract a ziah lawk duh loh chhan chu Fury lakah ‘thuak game’ a khelh vang niin an ngai a. Mahse Fury erawhin hei hi pha in a nuihzat takin a sawi zui.
Professional boxing a vawi 31 chak a draw vawikhat nei tawh Fury hi UK-ah a inel lohna a rei tawh avangin British Boxing Board of Control hnen a\angin boxing license a dil a ngai dawn a ni.