Mizoram Legislative assembly budget session nimina neihah Congress leh ZPM MLA-ten session kaihhruai tura deputy speaker an ngenna a hlawhtlin loh avangin lungawi lohna lantir nan house an chhuahsan a. Vawiinah speaker-in session a kaihhruai leh chuan house an chhuahsan leh dawn.
Nimin chawhma dar 10:30-a session tan a nih hnu lawkah ZMP Legislature Party Leader Lalduhoma chu ding chhuakin Ngaizawl khaw kawng laihnaah speaker-in Rs. nuai 100 zet a lo ei ve a ni tih chiang taka sawi a nih avangin house tihzahawm nan speaker chu session kaihhruai lo tura duhin deputy speaker chu kaihhruaitir zawk turin House Leader Zoramthanga an ngen tih a sawi.
An ngenna tihhlawhtlin a nih loh avangin an lungawi lohna lantir nan house chu an chhuahsan dawn tih a sawi a, hemi hnu hian Congress leh ZPM MLA-te chuan house hi an chhuahsan zui nghal a ni.
House an chhuahsan hnua chanchinbumite zawhna chhangin ZMP Legislature Party Leader Lalduhoma chuan, “Session-ah kan han kal leh ang a, amah bawk a thut leh chuan kan chhuak leh ang,” a ti.
Lalduhoma chuan speaker laka no confidence move tur an nih laiin hetiang ti tur chuan ni 14 hmaa notice pek a ngai tih a sawi a, “Hemi hi kan nghah chuan kan session a tawp ruai a ni dawn a, awmzia a neih tak loh avangin kan kawng neih chhun a nih tih hriain house kan chhuahsan ta a ni,” a ti.
Hemi chungchangah hian an party ve vete pawhin ngaihdan an nei thei a, an kal zel dan tur chu an la sawi theih loh thu leh an la ngaihtuah chawp zel tur thu a sawi bawk.
Eptuten house an chhuahsan hnu hian speaker chu an puhna chungchangah insawifiahin, a bial chhunga kawng siam tam tak chu a bial chhung miten ‘pakhatmah kan thawh loh chuan’ an tih avanga a nawrpui thu sawiin, “Pathian khawngaihnain mi pawisa naia khatmah ka la la lo tih hi ka sawi duh a ni,” a ti.
Lalrinliana Sailo hian, Ngaizawl-Khawzawl inkar aiin Lungtan-Khawhai inkar kawng siam hnathawh percent hi a chhe zawk tih sawiin, “A hmuna ngei eptu party-te kal se ka duh a ni,” a ti bawk.