Australian police chuan mihring an man duh ber pakhat, kum 12 chhung zet an lo zawn tawh chu an man ta.
Kum 64 mi, Graham Potter-a hi Victoria state-a tualthah tuma mi phiarna thubuaia court-a inlan tura koh a niha a inlan loh hnuah zawn zui char char a ni.
Police chuan Thawhtanni khan Queensland atanga kilometre sang chuanga a awm nia an sawiah kalin an man ta a ni.
An man lai video an thehdarhah chuan Potter-a hi pindan thim angreng taka ni zungin a chhun ruihah hnung lam hawiin a lo ding a. A kut hnungkhirhsakin hruai zui a ni.
Potter-a hi kum 1981 daih tawhah khan tleirawl a thah avang leh a ruang a thehthang bo avangin thiam loh chantirin a dam chhung tang tura hrem a ni a. Kum 15 a tan hnuah chhuah a ni.
Thawhtanni khan an ram sanaa zing dar 8:45 (India-a zing dar 6:15)-ah Queensland hmar lam hla tak, Ravenshoe-a in pakhatah man a ni leh ta a ni.
A tlan bo chhung hian Potter-a hi sorkar laipui chuan cocaine leh ruihhlo dang Australian $ maktaduai 440 zeta a sumdawn te, tualthah tuma mi a phiar avangtein thubuai an siamsak.
An ram chhung hmun hrang hrangah hmu nia insawi an awm tawh thin a; mahse, police chuan kum 2017 hma lama mite kha chu amah tih chiang lo vek niin an sawi niin Australian chanchinbu, The Age chuan a tar lang.
A chin hriaa hrilh thei hnenah A $ 100,000 zet pek an tiam bawk.
Potter-a hian a tlan bo chhung hian a lan dan a thlak fo va, amah hriat theih lohna turin engtin tin emaw a intidanglam thin tih Victoria Police chuan a sawi.
Potter-a hi Victoria-ah thawn a ni a, Thawhlehni khan court-ah hruai a ni.