Maharashtra Minister Nawab Malik chu Nilaini khan hun rei tak Enforcement Directorate (ED)-in Mumbai underworld, fugitive gangster Dawood Ibrahim leh a thawhpuite nena sum lama thawkhova puhna avanga thu an zawh fiah hnuah an man.
Man a nih hnuah amah lo changa lo nghaktu chanchinbumite chu a bana vaiin an phet thlu mai dawn lo tih a sawi a. “Kan bei ang a, kan chak ang, an vaiin kan hai chhuak vek ang,” tiin ED pisa atanga a chhuah pahin a sawi a. ED thuneitute hian damdawi thiamte endik turin lirtheiin an phur zui a ni.
Malik-a hi gangster Dawood-a thuihhruaite nen sum lo inthawn tawhin ram inleisak chungchangah pawh inremna an lo siam nia puh a ni.
ED chuan thu an zawh fiah lai hian thil a sawi tha duh lovin an thil chhuiah hian a thawhpui tha duh lo hle niin an sawi.
Tun hnaiah ED hian hmun hrang hrang an dap nasa hle a, Dawood-a unaupa, Iqbal Kaskar pawh Malik-a thubuaiah tho hian an custody-ah an la.
Finfiahna thenkhatah Malik-a ram a leite chu Dawood-a thuihhruaite nen hian an inzawm ngei tih a lang niin an sawi.
Kum 62 mi, Malik-a hi ED pisa-ah hian Nilaini tuk khan hruai a ni a. ED thuneitute hi a chenna inah zing dar 6:00-ah thlengin darkar khat vel thu an zawt a. An pisaah hruaiin darkar riat dawn thu an zawt zui leh bawk.
ED-in Malik-a thu an zawh fiah lai hian NCP worker-te chu Mumbai chhim lama an party headquarters, ED pisa bul lawkah pung khawmin BJP kaihhruai sorkar laipui leh Malik-a thubuai chhuitute an dem thu an aupui.
“Kan lungawi lohna hi dik lo taka Nawab Malik-a an tih vang a ni a, ni tin BJP+NCB+CBI+ED inzawmna a sawisel avanga hetianga tih tuar a ni a. Kan inhnuk hniam mai dawn lo va, NCP hian BJP leh central agency nihna hi a phawrh vek dawn,” tiin party thupuangtu, Sanjay Tatkare chuan a sawi.
Malik-a hian tun hnai lawkah Narcotics Control Bureau (NCB) Zonal Director Sameer Wankhede chu na takin a sawisel a. Anti-drugs officer hi a kaihhruaina hnuaia nikum October-a Mumbai tuipui kama lawng lian an dapah mi 20 zet an mannaah thil tih dik loh tam tak a nei niin a sawi a. Mi an man zingah hian superstar Shah Rukh Khan-a fapa, Aryan Khan pawh a tel.
Nikum khan a makpa, Sameer Khan chu ruihhlo chungchangah NCB Mumbai unit chuan an lo man tawh bawk.
Malik-a thubuai chungchangah hian NCP chief Sharad Pawar chuan Dawood-a hming chu mi puh chhiat nan hman fo a nih thu a sawi a. “Malik-a thubuai hi ka hre tam lo va; mahse, Dawood-a hming hi hmelmate beng hniamna atan hman a ni fo thin,” a ti.
Amah ngei pawh chief minister a nih lai khan Dawood-a nena inzawmna neia puh a lo ni tawh tih a sawi a. “Kum 25 liam leh hnuah khatiang trick bawk kha mi tihmingchhiat leh sawisak nan hman leh a ni,” a ti.
Shiv Sena MP Sanjay Raut leh Pawar hian central agency-te chu politics-a inbeihna avanga che chhuak mai an nih thu an sawi a. Sorkar laipui sawisel apiang chu an hnuaia agency-te chuan an bitum chat zel niin an sawi.
BJP erawh chuan politics-a phuba lak nana hetiang thleng anga an puhna chu phain, Malik-a hian gangster Dawood Ibrahim-a thawhpui hnen atangin ram a lei niin an sawi.
Mumbai-a Ghatkopar West bialtu BJP MLA Ram Kadam chuan ram hi ram hi sorkarin hren a tum laiin minister hian bomb tipuaktua puh hnen atang hian man tlawm takin a lei niin a sawi.