Russian President Vladimir Putin chuan a thenawm, Ukraine chu sipai chakna hmangin a run ta a, ram chhung hmun hrang hrangah thil puak thawm hriat tur a awm a. Ukrainian foreign minister chuan ‘thapuia inrunna’ a thleng mek tih a sawi.
Ukrainian President Volodymyr Zelenskyy chuan Russia hian missile hmangin Ukrainian in sak lian leh hmun pawimawh bakah ramri vengtute awmna hmun an kap tih a sawi a, khawpui dang dangah pawh thil puak thawm hriat tur a awm a. Thuneitu sang pakhat chuan cyberattack an ti nasa hle bawk niin a sawi.
Zelenskyy chuan martial law a puang tawh.
Ukrainian chuanchinbute chuan Kyiv-a military command centre leh hmarchhak lama Kharkiv khawpui chu missile hmanga kah an nih thu an tar lang a. Russian sipaite chuan chhim lama lawngchawlhna khawpui pahnih, Odesa leh Mariupol an thleng tawh bawk.
Russian sipaite hian Belarus ram atang pawhin Ukraine hi an kap a. Belarus hi Russia lamtang a ni a. Ukraine border guard service chuan Crimea atang pawhin an ram hi an kap bawk niin a sawi.
Russian defence ministry chuan tun tuma an thenawm ram an rûn mekah hian an airbase-a an thilte an bei tih a sawi a, boruak lama an invenna tihchhiatsak an tum.
Ukraine hian a chung boruak chu mihring phur thlawhnate him zawk nan thlawk theih loh turin a ti nghal a. Russia pawhin Ukraine ramri hnaiha thlawhna tumhmunte chu mihring phur thlawhnate tum leh thlawh chhuah theih loh turin March 2 thleng a khar bawk.
RIA news agency chuan Russia-in a thlawp, Ukraine khawchhak lama inlak hran tuma beitu hel pawl chuan khaw pahnih an la tawh niin a tar lang bawk.
Russian sipaite chuan President Putin-an sipai chakna hmang tura thu a pek hnuah missile-in Ukraine khawpui hrang hrang a kap nghal a. Ukranian 40 leh Russian sipai 50 an thi tawh niin Ningani tlai thleng khan sawi a ni a. Ukraine-a Odessa khawpuiah civil mi 18 an thi bawk nia tar lan a ni.
Ukraine hian an ram chhung dai lut Russian sipai 50 vel an that niin an sawi a. Hei hi Russian sipaiten kul hrang hrang atanga an ram an dai hnu lawka an puan a ni.
Russian defence ministry chuan Ukrainian air base eng emaw zat an tichhia niin a sawi a, Ukraine-in van boruak lama invenna a neihte chhut chahsak a tum tih a tar lang.
Ukraine chuan khawchhak lamah Russian thlawhna leh helicopter an kap thla niin a insawi bawk a. “Joint Forces Command chuan vawiin, February 24 hian Joint Forces operation a thlaknaah min rawn rûntu thlawhna panga leh a helicopter kan kap thla a ni,” tiin army general staff chuan a sawi.
Ukrainian Deputy Interior Minister Anton Gerashchenko chuan Russia hian missile hmangin Kyiv, Kharkov leh Dnieper khawpui bula an sipai hmunpui, thlawhna tumhmun, sipai hmanraw dahna an kap niin a sawi.
Tual chhung chanchinbute chuan Kyiv-ah thil puak thawm a awm a, thlawhna tumhmunah pawh silai puak niin an tar lang.
Chawlhkar eng emaw zat indawr leh khawthlang ramten Russia chu hrekah vau mah se President Vladimir Putin-a an vau zam chuang lo va, Ukraine ramri-ah a sipai 1,50,000 atanga 2,00,000 vel a chhawp.
Russia hian NATO-in khawchhak lama huang a zauh zel leh Ukraine-in United States kaihhruai sipai tangrual zawm ve a tum chu a pawm lo.
Putin-a’n Thawhtannia Ukraine khawchhak lama inlak hran tuma bei hmun hnihte indang anga a puan hnuah laipui a puak tan a. Heng ram bial hnihah hian ‘peacekeeping force’ atan tiin a sipai a tir lut zui a; khawthlang ramte chuan Ukraine rûn tura a bul tanna niin an sawi thung.
Khawthlang ram leh Japan chuan Russian bank leh mi mal eng emaw zat a hrek nghal.
Nilaini khan inlak hran tumte hian Moscow hnenah Ukraine-in a nawr reng titawp tura pui turin a ngen a. US erawh chuan hei hi a pawmpui lo.
Russia-in a rûn dawn tih a chian hnuah Ukrainian President Zelenskyy chuan a ram mipuite hnenah indona chu ‘chhiatna lian tak’ a ni tih a sawi.
“Kan ram hi kan hnen atanga lak sawna kan zalenna, kan nun leh kan fate nun lak an tum a nih chuan kan inveng ve ang,” a ti.
Ningani tuk khan Putin-a hian Ukraine-in an ram a nawr zel do let turin a sipaite che turin a tir ta a ni.