Mumbai khawpui laili, khawthlang leh chhim lam hmun thenkhat chuan Pathianni tuk khan power supply an dawng lo va, khawpui nunna ber pakhat, tual chhunga rel tlan a buai phah hle.
Tun tum hi India sumdawnna khawpuia October, 2020 hnu lama power a awm loh liantham hmasa ber a ni a. Grid lama thil fel lo avangin khawpui pum deuhthawin electric an nei lo tih thuneitute chuan an sawi.
“Technical thil fel lo thenkhat avangin khawpui hmun tam takah power supply a awm lo va. Kan team-in an bei mek a, darkar khat vel hnuah a that beisei a ni a. Min lo dawh hram hram rawh u,” tiin tual chhung rorel khawl, BMC (Brihanmumbai Municipal Corporation) chuan chawhma dar 10:00 vel khan Twitter-ah an tar lang.
Darkar khat chuang hnuah Maharashtra State Electricity Transmission Company Limited (MSETCL) chuan an tihthat leh tawh thu an sawi zui a. Tata Power Supply chuan chawhma dar 9:50 leh 10:53 inkarah an chhiat thu an sawi a, technical thil fel lo avanga buai an nih thu an sawi.
“Mulund-Trombay-a MSEB 220kv Transmission line-ah trip a awm avangin Mumbai hmun tam zawk a chhia tih BEST-a Head of Electric Supply Division atangin kan dawng,” tiin BMC chuan a tar lang.
power awm lo avang hian zing dar 9:00 leh 10:00 inkarah rel tlan a buai phah hle a. Western Railways Chief Public Relation Officer Sumit Thakur chuan dar 10:40 velah, “Rel hi Churchgate atanga Vile Parle railway station inkarah a buai a. Tunah erawh tihnun leh tawh niin dan pangngaiin a kal,” a ti.
Chawhma dar 10:30 velah Central Railway Chief Public Relation Officer Shivaji Sutar pawhin rel hi dan pangngaia a tlan leh tawh thu a sawi a. “Power supply trip avangin vaukam hnaih leh Chhatrapati Shivaji Maharaj Terminus (CSMT)-Kalyan inkar tlan chu dar 9:49 leh 9:52 inkar a buai a ni,” a ti ve bawk.