Sorkar in HPC chungchang a ngaihtuah vat a tul
Rawtna leh duh dan inan lohna avangin ram chhungah ngei pawh buaina a chhuak thin a, politics hri tha lo avangin harsatna nasa tak kan lo tawk tawh thin bawk. Chungte chu a reh theih nan mimal leh pawl tam takin hma an la a, sorkarna chelhtu apiang an nawr a, an ngen a, chung zawng zawng rahchhuah chu vawiina ralmuanga kan awm theihna hi a lo ni ta.
Ralmuang chho ta viaua kan inngaih hnu leh thinthi diaia kan awm laiin tuteemaw politics hri tha lo vang bawkin harsatna kan tawk leh thin a, buai lohna tur bawkah kan buai leh a, hei hi a pawi thin ngawt mai. Khua leh khua pawh ni lo, rampum nghawng harsatna thleng thin hi chu en liam mai chi niin a lang lo a, sorkar hian remna kawng a zawn vat vat thin a tha hle.
February 26, 2022 (Inrinni)-a HPC Party General headquarters office bearer thukhawm chuan SHC sorkar tluang taka a kal laia HPC leh MNF inremna zah loa sorkar paih tuma hmalakna leh SHC zahawmna humhimna atan Sakawrdai area-ah vawiin, March 1, 2022 atang hian tiam chin awm lovin total bandh neih an rel a, a tul dan ang zelin SHC area pum puiah pawh total bandh hi puan chhunzawm zel an rel bawk. Hei hi a bul chu tuteemaw politics hri tha lo vawrh vang bawk a tih theih awm e.
HPC te ngei pawh hi sorkar a intulut tawh, remna duha mahni silai ngei pawh tung tawh an ni a, tuna ralmuang leh ngaihngam taka an awm chhoh ve tan mek laia hetiang innghirnghona lo awm hi a pawi a, inremna kawng zawng tura sorkar a chet thuai thuai a, a mi leh sate kuahkhawm zawnga hma a lak vat pawh a tul hle. Ram nuam i siam zel zawk ang u.