Russia chuan an ram pawisa, rouble hlutna tlahniam chak lutuk tihtawp a nih theih nan a punna (interest) rate chu 20% zetin, an kalpui thin pangngai aia a let aia tamin a tisang ta.
Bank of Russia chuan an pawisa punna zat bi, 9.5% ni thin chu Ukraine an rûn avanga khawthlang ramte hrekna avanga rouble hlutna 30% zeta a tlakhniam avangin an tipung vak a. Heti chung pawh hian an pawisa hlutna hi 20% zetin a tlahniam tho.
An pawisa hlutna tlahniam hian an an pawisain thil a tihtheihna nasa takin a tihniam a, Russian-ten an pawisa khawl sa pawh awmze awm lovah a chantir dawn.
Kartawpah khan mi tam tak chu pawisa lak chhuahna, cash machine-ah an intlar a, hetih mek lai hian Russia chuan an tawrhna chhan letna an kalpui ve dawn tih a sawi.
President Vladimir Putin-a hova Thawhtannia a economic adviser-te an thutkhawm hma lawkin Kremlin thupuangtu, Dmitry Peskov chuan, “Heng hrekna hi a na hle a, kan buaina a ni a; mahse, Russia chuan a tul angin heng hrekna avanga zangnadawmna a siam ang,” a ti a. Russia chuan amahin hrekna a siam angin a chhang let ve dawn tih a sawi.
Kar tawpah khan Russia-a central bank chuan mipuite chu buai lo tur leh sum lama hrekna an tawrh chu an bank-te kal dan a buai phah dawn loh thu a sawi a. “Kan sum dinhmunin ngai a awh rengna turin hmanrua leh châk kan ngah tawk,” an ti.
Social media-a thlalak thehdarhah chuan Moscow khawpuia cash machine leh pawisa thlengna hmunte chu a lun hle a. Mipuite hian an bank card chu nakin lawka a hman theih loh emaw, an duh ang zat la chhuak thei lova tih thut emaw an hlau hlawm a ni.
United States, UK leh EU chuan an ramin Ukraine a rûn avangin Russia bank-te hi khawthlang ram nena indawr tawn a khapsak a. Hei hi an tuar tan mek.
Russia hian sum dah khawp $ tluklehdingawn 630 vel zet a nei a, hengte hi tuialhthei leh boruakalhthei man sang atanga inchhek khawl a ni.
Heng sum a khawlte hi ram dang pawisa – dollar, euro leh sterling bakah rangkachaka awm a ni a. Khawthlang ramte an bank-te nena indawr tawn a khap rih miau avangin a khawih che thei lo a ni.
Russia ram hi ram hausa an nih miau avangin khawthlang ramten sum lama an hrekna hi anmahni bakah a hrektute leh khawvel pumin a tuar tel ve dawn.
Boruakalhthei pek chhuahna man chu thla rei vak lo lo awm leh tur chhung hian 24% vel zetin a sang dawn.
Sum lama insawhnghet tawh, European market pawhin a tuar thei dawn a. London-a FTSE 100 chu 1% chuang leh Paris leh Frankfurt chu 2% chuangin a tlahniam tawh.
Tuialhthei thlitfim loh man chu 5.4%-a sangin barrel khat $103 a ni tawh.
Tuialhthei lama khawvela company lian, BP chuan Russian tuialhthei leh boruakalhthei lama a chetna, $tluklehdingawn 25 zet a chawlhsan avangin a hlutna 7% zetin a tawlh thla.
Russia leh Ukraine atanga wheat thawn chhuah a tlem duai avangin kum tam tak hniha a man san lai ber a tawng mek.