Ukrainian lawng mi (sailor) pakhat chuan Russia sorkar hnuaia ralthuam siamtu firm lian tak pakhata an hotua nawmchenna lawngleng (yatch) chu an ramin Ukraine an rûn avangin tuipuia tihpil tuma a beih thu a sawi.
Metre 48 (157ft)-a sei, Lady Anastasia hi Rosoboronexport director general Alexander Mikheev-a ta niin Spain-a Majorca lawngchawlhnaah a inhung a, mechanic hian a engine room luhchilhin a valve vel a lo hawng a ni.
Mechanic hi Inrinni khan Civil Guard officer-ten an man a, a hnuah bail-a chhuah leh a ni thung.
Judge hnenah a thiltihah engmah inthiam lohna a neih loh thu leh a tih nawn leh hial a rin thu a sawi.
Ukraine-a thil thleng television atangin a lo hmuh chuan Mikheev-a yacht hi a bei ta niin chanchinbute chuan an tar lang.
“Video ka enah hian helicopter hmangin Kyiv-a in an bei a ni,” tiin tual chhung chanchinbuten a thil sawi an tar lang a. “Pawi sawi lo nunau an bei a ni,” a ti bawk.
Inrinni khan Kyiv bul, Zhuliany thlawhna tumhmun bul maia in chhawng sang chu missile-a kah fuh niin in chhawng nga ang vel chu a kaw huau a ni.
A lawng beih a nih chungchangah hian Mikheev-a emaw, Rosoboronexport emaw chuan eng thu mah an la sawi lo va. An firm hi Russia-in a siam ralthuam thawn chhuaktu niin an khawih zingah tank, indonaa hman chi lirthei, thlawhna, lawng, ralthuam leh puak thei dangte pawh a tel.