Auto Corner
by Ruata
Jeep Compass Trailhawk
American company lar Jeep chuan an SUV Compass-ah pawh kawng chhe ngam lehzual tur Compass Trailhawk chu India ramah a vawi hnih nan an rawn tichhuak leh ta a. 2022 Compass Trailhawk hi Rs. Nuai 30.72 (ex-showroom) man atangin a intan ang..
Rs. Nuai 30 chuang man lirthei hi Mizoramah hian kan hmu hnem ta khawp mai a. Hei pawh hi Mizoramah kan hmu leh thuai turah a ngai ila, Jeep Compass pangngai hi chu kan hmu nual tawh a. Trailhawk tak hi chu kawng chhengchhia tlan thei tura 4×4 system changkang taka thuam a ni a. Keini ang tlangram chhengchhia atan phei chuan a tha viau tura ngaih a ni.
Design leh kentel tur te
Jeep Compass Trailhawk hian headlamp leh grille thar, Compass Facelift-a kan hmuh ang a rawn nei dawn a. A bumper kil lam erawh a hriam deuh vak bik dawn thung a ni. Hei bakah hian lei atangin a sang deuh dawn a, kawng chhengchhia leh chho taka lawn nghal tur pawha a bumper hrut lo tura duan a ni.
Heng bakah hian Jeep offroader a neih thin bonnet decal, 17 alloy wheel bakah 225/65 “all season tyre”, ride height sang hret, a hnunglamah lirthei dang hnuhna tur tow hook sen, a fender-a Trail Rated badge leh Trailhawk logo te a nei ang.
A kentel tur hrang hrang zingah 10.1 inch touchscreen infotainment system, 10.25 inch digital instrument cluster, LED projector headlamp, LED fog lamp, auto dimming interior rear view mirror, rain-sensing wiper, 360 degree camera leh panoramic sunroof te a tel dawn a ni. Heng bakah hian Jeep Compass Trailhawk ah hian a hmaa chhuak model hoin an neih ngai loh ventilated and powered front seat, a driver thutna lama memory function awm tel te a nei dawn a. Hei hi Jeep Compass pangngaiah chuan a awm thin tho.
Offroad lam hmanrua
Jeep chuan Compass Trailhawk tharah hian a khan san zawng hi inch 1 in an tisang a. Heng offroader lirtheiah hi chuan inchi hnih khat leka tihsan hian awmzia a nei thui khawp a, Compass Trailhawk a sang hret tur pawh hi a tha hle dawn a ni. Hei bakah hian kawng chho thut a tlan nghal theihna tur approach angle hi 30 degree a ni a. A pangngaiah chuan 16.8 degree chauh a ni. Hei bakah hian ramp break over angle hi 24 degree a ni a, departure angle hi 34 degree a ni dawn a ni.
Jeep Compass pangngaia 4 wheel drive ah hian 20:1 low ratio awmin hei hian kawng chhiaah nuam takin a tlan tir thei a. Tuna Compass Trailhawk lo chhuak tharah hian hemi awmsa bakah hian Rock drive mode awmin hei hian nasa takin a pui lehzual dawn a.
Hei hi a hmaa Compass Trailhawk-ah pawh kan hmu tawh tho a ni. Compass Trailhawk tharah hian a hnuailam body himna tur full underbody protection plate a awm a, sidewall protection atana tha zawk tur a pangngaiin an neih aia wheel rim te hret 17 inch alloy wheel a nei a, mud plus snow tyre a nei bawk a ni. Compass Trailhawk hian tui mm 483 a thuk a dai thei.
A khawl leh thildang
Jeep Compass Trailhawk hian 170hp piwer pechhuak thei 2.0 diesel khawl a hmang a. Transmission lamah chuan 9 speed torque converter automatic gearbox a nei a, four-wheel drive system a nei bawk.
Jeep hian an lirthei thar tur, mihring thut tam theihna tur chi Jeep Meridian chu May thla hian tlangzarh an tum a. An SUV lar em em mai Grand Cherokee chu India rama remkhawm thei turin hma an la mek bawk a ni.