Joint Electricity Regulatory Commission for Manipur & Mizoram chuan nimin khan Aijal Club-ah kawlphetha chhit man tihsan chungchangah mipui ngaihdan ngaihthlak a ni. Pawl leh mi mal anga kawlphetha tihsan rawtna duh lohna an thlen chungchang te ngaihthlak a ni.
Tun hnaiah Mizoram sorkarin kawlphetha tihsan rawtna JERC-a an thlen chungchangah, kawlphetha chhit man tihsan duh lohna mi chi hrang hrangin JERC Commission hnena an thlen chu an thlir ho a. Mi sawm atangin eng chhitman tihsan rawtna duh lohna hi JERC chuan an dawng a ni.
JERC hian êng chhit man tihsan rawtna hi political party bikah Congress aiawhin MPYCC President Dr Lalmalsawma’n petition a thehlut a, ZPM atangin Secretary general PC Vanlalruata hminga thehluh ni bawkin, PC Party atangin Senior Vice President Vanlalruata hminga theh luh a ni bawk.
Congress aiawhin General Secretary TT Zothansanga’n chuan petition thehluh a sawifiah a, PC Party aiawhin Vanlalruata leh ZPM aiawhin General Secretary Lalmuanpuia Punte-ten petition an thehluh te sawifiahna an neih bakah zawhna an zawt nghal a ni.
CYMA President kal chhuak Vanlalruata’n petition a thehluh a sawifiah bawk.
Mizoram Consumers’ Union aiawhte leh Mizoram Industry Owners Assn. aiawhte bakah mi mala petition thehlut an awm nual bawk.
Nimina zawhna leh chhanna leh sawi belhna te chu a hrana thutlukna lakna atana hman a ni dawn lo a. Lehkha thehluh theih hun chhunga thehluh atanga affidavit siama thehluh chiah pawm a ni.
JERC for Manipur leh Mizoram-in hearing a koha ngaihven a hlawh ber tum a ni tih JERC lam hotute hian an sawi a. Petition 10 a lut a ni.
JERC hotute chuan Kawlphetha chhit man pung tura P&E dept. lamin an rawtna hi 20.5% lai a ni a, hei hi danin a phut anga kum tina a punna tur hi rawt tura a tih avanga rawt an sawi a. Nikum khan P&E hian 41.92% lai kawlphetha chhit man tihpun lo rawt tawhin, hei hi JERC chuan a sang em mai tiin 20.68% in April 2021 khan Mizoram eng chhit man tihpun a lo ni tawh a ni.
Tun dinhmuna Mizorama consumer zawng zawng hi 265022 awm mekin, 62.16 % hi dosmestic consumer an ni a. Dosmestic consumer tan bika eng chhit man tihsan an rawtna percentage chu 10.87% a ni thung.