Khawvel ram tam zawkte chuan United Nations-in Ukraine ram rûntu, Russia chu a sipaite ‘rang takin, an vaiin, intiam kamna awm lova’ la chhuak tura resolution a siam chu an thlawp.
Resolution hi Nilainia tih ngai mai mang lohva UN General Assembly thutkhawm hmanhmawh chuan a pawm a ni.
UN-a tel ram 193 zinga 141 chuan resolution hi an thlawp.
Vote laknaa ram 35 hai (abstain) zingah China, India leh South Africa pawh an tel a. Ram panga – Eritrea, North Korea, Syria, Belarus leh Russia chauhvin an duh lo a ni.
Resolution hian Russia-in a thenawm ram a rûn chu na taka demin President Vladimir Putin-a’n nuclear ralthuam chelek mai pawh hlat lo anga a awmna chu ngaihven ngai hle a ni tih tar lan a ni.
General Assembly-in resolution a siama vote laknaa a thlawptu an tam em em hi Ukraine tana hnehna pakhat leh ram dangte laka Moscow a hran takzia entirnaa ngaih a ni.
Russia kawmngeih em em rengtu, Serbia meuh pawhin Kremlin hi a thlawp lo.
UN Secretary-General Antonio Guterres chuan General Assembly duh dan chu a chiang tawk hle tih a sawi.
“Ukraine rûnna chu tunah tawp nghal rawh se. Silai pawh tunah dah nghal ni rawh se,” tiin a thuchhuahah a tar lang a. “Ukraine-a mipuite dinhmun chu tunah hian a chhe em em tawh a, a chhiat belh zel pawh a hlauhthawnawm,” a ti bawk.
General Assembly-a ram hrang hrang palai, thusawitu zawng zawng deuhthawin indona thleng mek chu an dem thu an sawi hlawm.
Ukraine palai, Sergiy Kyslytsya chuan Russia chuan an ram tihchimih tumin a bei niin a sawi a. “An tum chiang tak chu Russia hian kan ram luah mai a tum lo va, mi suat vek a tum,” tiin vote thlak hmain a sawi.
UN rorelnaah hian Russia palai chuan civil mite bei leh tum anga an puhna chu nasa takin a pha.
Vassily Nebenzia chuan Russia-in a tum ber chu special military operation a nih thu leh Moscow-in a thlawp, Ukraine khawchhak lama Donetsk leh Luhansk-a civil mite tawrhna thleng tihtawp a nih thu a sawi ve thung.
Nebenzia chuan Ukrainian sipaiten inphen nan civil mite an hmang a, an chenna laiah an ralthuam liante an chhawp zawk niin a sawi bawk.
“Vawiina resolution i thlawp hian Ukraine-in zalenna a neih tur chu chibing thil thlenna leh Nazi enkawlna hnuai ang maia a awmna tur lakah i dal tihna a ni,” tiin assembly-ah hian a sawi bawk.
Russia thawhpui, Belarus pawhin inrûnna thleng mek chu a tan tlat bawk.
Ambassador Valentin Rybakov chuan khawthlang ramten Russia an hrek chu ‘economic & financial terrorism entirna chiang tak’ a nih thu a sawi.
Russian thawhpui dang, Syria chuan khawthlang ramte pawhin tun hnaiah Libya, Iraq leh Afghanistan pawh an rûn ve tho niin a sawi.
Nilainia vote thlaknaa hai ramte chuan resolution siam chuan a tha tur anga indawrna engmah a siam phah dawn chuang lo nia sawiin vote an thlak lo.
China palai, Zhang Jun chuan resolution siam tur hian assembly-a tel ramte inrawnna tak tak engmah a awm lo niin a sawi.
“He thil hian tuna buaina bulpui leh hun kal tawh (history) engmah a sawi chiang lo va. Thil tha zawk engmah a thlen phahna tur a awm lo,” a ti.
China hi tun hnaiah Russia nen hian inkawmngeihin khawthlang ramten Moscow an hreknaah pawh a tel lo.
South Africa palai, Mathu Joyini chuan an hai chhan ber chu ‘resolution-ah hian palai tira inbiak, indawr leh remna zawngtu tur thlen phahna tur’ a awm loh vang niin a sawi.
UN Security Council-in General Assembly thutkhawm hmanhmawh a koh hnuhnung ber chu kum 1982 daih tawh kha a ni.
Russian sipaite chuan Ukraine chhim lama lawngchawlhna khawpui pawimawh tak an la tih an mayor chuan a sawi.
Kherson hi Russia-in kar hmasaa a rûn tan hnua khawpui lian an lak hmasak ber a ni.
Mayor Igor Kolykhaev chuan Russian sipaite hian city council building panin mi chengte lakah curfew an puang.
Khawpui dangah pawh Russia hi hma an sawn zel a, Nilaini kha indona a chhuah hnua thil chhia a tam ni ber a ni.
Russia chuan a vawi khat nan indonaa an sipai chân zat an sawi ve ta a, sipai 498 thiin 1,597-in hliam an tuar niin a sawi a. Ukraine chuan Russia hian sipai sang chuang an chân tawh niin a sawi ve thung.
Ukraine hian civil mi pawh 2,000 chuang an thi tawh niin a sawi a. Mi maktaduai chuangin Ukraine an tlanchhuahsan tawh niin UN chuan a sawi bawk.
Facebook-ah Mayor Kolykhaev chuan Russian sipaiten Black Sea kama mi 2,80,000 chuang an chenna, Kherson an thunun thu a tar lang a. Russian sipaite hi civil mite kap lo tur leh khawpui chhungah Ukrainian sipai an awm tawh loh thu a sawi.
Ukraine khawpui lian ber dawt, Kharkiv pawh van lam atanga nasa taka kah a ni a. An mayor chuan laipui leh cruise missile hmangin civil mite chenna kah niin tam tak thi leh hliam an awm tih a sawi.
Chhim lama lawngchawlhna, Mariupol pawh laipuia kah mawlh mawlh a ni a, mi tam tak an thih rin a ni.
Russian-te hian khawpui ber, Kyiv an beih mekah erawh hma an sawn chak vak lo thung.
&&&&&