liRThei veivahna
Lirthei tamna khawpui a ni a. Traffic light hi driver te’n an ngaipawimawh em em thin. Traffic police hmuh tur an awm meuh lo, traffic light hian driver te a thunun hneh hle.
sik leh sa
Moscow hi khawmualpui laili-a awm a nih vangin thlasik laiin a vawt em em a, nipui laiin a lum em em bawk. July leh August hi khawlum lai ber niin, +30 atang 35 celcius a ni tlangpui. Hemi hun chhung hian thingkung te’n hnahhring an chhuah hun a ni a, a mawi hle. Hemi hun chhung hian zan a tawi hle. Tlailam dar 11 (pm) velah khua a thim a, zing dar 4 ah khua a var leh tawh thin. Tichuan, September thla atang thlasik rim a nam tan a, Dec. Jan. leh Feb. ah meuh chuan vawt tak a ni tawh. Thinghnah leh hlobet mawi tak tak chu vurin a khuh bo zo vek a, hmuhtur reng a awm tawh lo. Thlasik lai hian Zan a rei em em mai a. Tlai dar 4 ah chuan khua a thim fel der tawh thin a, zing dar 7 velah khua a var.
vanTlang nun
Khawvawt ram a nih angin BEER leh Sikret an ngai na hle. Khawvawt tih reh nan “Vodka” a tha tih a ni thin. Nula/ tlangval te an zalen em em a, zanlenna erawh an hmang thiam tlangpui. Russia rama UNIVERSITY ah reng reng RUSSIAN tawng hmang veka lehkha zir a ni. ENGLISH tel miah lovin Doctorate Degree tam tak a lak theih tlat hi an ngaihsan awm em em a ni. Mikhual (ramdangmi) hi an ngaina em em hran lo. Tin, aia upa zah HNAM an ni. Abikin Pitar Putarte an zah hle. Bus emaw Metro emaw ah chuang-in thutna tha lo luah mah ila, Pitar, Putar an rawn luh chuan thutna lo ken pah a, “Ka pi, ka pu. hetah thu ta che” tih hi an HNAM tihdan mawi em em a ni.
Mipa leh hMeichhe DinhMun
Europe ram thenkhat ang bawkin mipa leh hmeichhia intluktlanna khawpui a ni. Communist rawn luh (1918) avang khan hmeichhia te’n hna an thawh nasat phah em em a. Chumi rah chuah chhunzawm zel chu tun-thleng hian a la awm ta zel a, hmeichhia te’n hna an thawk nasa hle.
incheina (Fashion)
Inchei uarna khawpui a ni na-in inchei vak lo te pawh an nuihsawh emaw, mak tia en deuh emaw an ching lo. Mahni inbel ang angin an lungawi mai.
univeRsiTy sTuDenT Te Tan
Zirna runsânga zirlai te chuan thil tamtakah duhsakna an dawng nasa em em a. Lirthei chuan man thlakhat tan tawp tlawm takin sawrkarin a pe chhuak thin. Tin Museum emaw, Park emaw, Zoo emaw ah pawh zirlai tan student card hmuh maiin man chawi ngai lova luh theih a ni.
hMun Fan hlawhTe
The Moscow Red Square(hetah hian Lenin ruang zalh a ni), The Kremlin, The Moscow Zoo, Victory Park, Culture Park, All-Exhibition Centre, Tretyakobskayar Museum (Hetah hian lemziak hlui chi hrang tam tak hmuh theihin a awm), Astronout Museum (Amstrong leh a hnua midang ho leh an bungrua hmante en theiha dah a ni) leh a dang tam tak a awm.