Auto Corner
by Ruata
Chennai-a inkulh India bike siamtu hlun leh lar Royal Enfield chuan an adventure bike chhuan tak Himalayan nghahchhana an siam tur Scram 411 chu March ni 15-a tlangzarh turin ruahmanna an siam mek.
He bike hi Royal Enfield Himalayan nena khaikhin chuan Himalayan phelhruah deuh tihte pawn a sawi theih. Tunlaia Himalayan neitu tam takin an siam danglam ang deuh te pawh hi a ni awm e.
Mi tam tak suangtuahna, Himalayan siam
danglam an duh dan mil thlapin dak nalh takin Royal Enfield chuan an rawn duang a ni ber a, leitu pawh an tam viau a beiseiawm a ni.
Design
Himalayan Scram 411 hi Himalayan chhuak mek nena khaikhin chuan a ruak hret a. He bike model tharah hi chuan a hmaa Himalayan in a neih ang windscreen chu a nei tawh lo a. A fuel tank shroud pawh Himalayan aiin a te hret tawh a ni.
Scram 411 ah hian meta headlamp cowl, 19 inch front wheel, side panel thar leh seat design thar kan hmu dawn a. A ke bik hi a hmalamah hian Himalayan chuan 21 inch hlai tha phuk mai a nei a, Scram ah hi chuan a rawn te ta hret a ni.
Royal Enfield Scram 411 ah hian hmanlai design kan tih mai, retro design a la neih chhunzawm zel a. Dual purpose tyre, wide handlebar, single piece grab rail, fork gaiters leh upswept exhaust te kan hmu leh bawk a ni.
Ken tel dang
Royal Enfield Scram 411 hian instrument console thar a nei dawn a. Himalayan-a awm lo rawng chi thar pawh Scram-ah hian a awm beisei a ni a. Tunah hian Himalayan hi rawng duhthlan tur – Pine Green, Granite Black, Granite, Gravel Grey, Rock Red, Lake Blue, Mirage Silver leh Sleet Grey te a awm mek a ni.
A khawl leh thildang
A khawl lamah chuan Himalayan-a kan hmuh ang chiah 411cc single cylinder air cooled SOHC khawl a hman hmel a. He khawl hian 24bhp power leh 32Nm torque a pechhuak thei a ni. Tuna Scram atan hian company lam chuan a bike mil tûrin a khawl hi a tune danglam a rinawm bawk.
A brake leh suspension lamah pawh Himalayan-a kan hmuh ang chiah kan hmuh leh hmel a. A hmalamah telescopic fork leh a hnung lamah monoshock te kan hmu dawn a ni. Hei bakah hian a hnung leh hmaah disc brake a nei leh ang a, dual channel ABS a nei leh dawn bawk a ni.
Royal Enfield Scram 411 hi Himalayan aia a tlawm beisei a ni a. A chanchin kimchang leh a man tur pawh ka hre thuai tawh dawnin a lang a. He bike duhtute tan chuan nghah chhung a rei vak tawh dawn lo a ni.