Chart hrang hranga a hlawhtlinna reng reng a hlimpui hman ngai lova, hmun dang danga tour nei a buai thin vangin a hre zui ngai hauh lo niin, Bryan Adams-a’n a sawi.
Kum 62 mi Canadian rock legend hian khawvelhuapa hla lar, ‘(Everything I Do) I Do It For You’-in 1991 kuma thla li chhungzet UK-a number 1 a nih khan a hre lo pek a ni awm e. No. 1 artist a nih lai khan tour nei reng a nih avangin a hlawh-tlinna a feel hman lo.
The Independent chan-chinbuin a kawmnaah Bryan chuan, “Tour ka nei reng a, mite’n ‘UK-ah number one i ni a sin’ an tih te khan chuti teh vakin ka feel lem lo. Chawl hman lek lova tour kan nei chhunzawm vangin kum 4 chhung kha chu ka hlawhtlinna ka hlimpui hman lo tluk a ni.
“Khami hnu khan hmun tam tak ka tlawh a ngai a, mipui tam zawk hmâa zai a lo ngai leh a, tour a rei tual tual bawk a, min hrilh lo phei se chu hriat ngaihna a awm lo hrim hrim,” a ti.
Hriatlar loh kum 10
Heng hla, ‘Heaven’ bakah ‘Summer of 69’ te hmanga hriatlar Bryan Adams hi rimawi khawvelah kum 10 zet a tal hnu chauha khaw-velhuap anga hriatlar a ni chauh a, ram thahnem takah phei chuan chart-ah pawh a lang lo hrim hrim. Mahse, ‘Summer of 69’ chuan ram tin maiah hlawhtlinna leh hmingthanna a thlen chho nghal zut zut mai a ni.
Vawini hian Bryan Adams album 15-na thar, ‘So Happy, It Hurts’ chu tlangzarh a ni dawn a, a phur hle. Kum lamah uai thla deuh tawh mah se, hla thar siam theia dam a hauh lui tlat zel chu atan pawh in-chhuanna tham a tling a, fan te tan chanchin lawmawm a thlen zel dawn e.