Mizo rawlthar table tennis player Lalrinpuia chu kum 2017 December thla a Mumbai Airport a man a nih hnuah Thawh\anni khan Mumbai High Court-ah thiam a chang a, chhuah zalen a ni ang.
Lalrinpuia hi bumna avangin December 13, 2017 khan Mumbai Airport-ah a zin haw chu Narcotics Control Bureau in a bag-ah Methaqualone an man a. Hemi hnuah hian Taloja jail-ah dah niin thubuai siamsak a ni zui.
Kum li chhung a case hi buaipui a ni a, Mizoram Table Tennis Association bakah sport association dangte, Mizoram sorkar bakah a chhungte leh amah lainattu leh duhsaktuten hma la in an case hi High Court bakah Supreme Court thlengin a kal a. March 14, 2022 khan court in thiam a chantir.
Chiang zawkin
Lalrinpuia hi Anshul garg Academy a table tennis training a awm lai a ni a. Lalchhuankima leh Loicy te fapa niin Maubawk Veng, Aizawl-ah an cheng.
Kum 11 a nihin India ram a table tennis zirna \ha Petroluem Sports Promotion Board (PSPB) Table Tennis Academy-ah inzir turin Ajmer, Rajasthan-ah a awm a. He hmun a\ang hian rampum huap inelnaah age group hrang hrangah hlawhtling hle in, national level inelnaah medal 40 chuang a la tawh a. National Championship-ah \um sarih champion a ni tawh.
India aiawhin khawvel hrang hrangah inel \hin bawkin international medal pariat a la tawh.
Table tennis a an dahsan defensive player niin India team squad-ah pawh telh a ni hman.
Kum 2017 December khan Africa a Mozambique-ah senso tumsak veka zin turin sawm an ni a, he sawmna hi inbumna niin a mawhphurtu zingah hian Mizo nula pahnih an tel.
An lo haw leh lamah Rinpuia bungrua ah hian an zinna a\anga an thawn, thawmhnaw bag-ah hian ruihhlo hmuh a ni ta a. Hei vang hian man a ni zui ta a ni.
Engtin zel?
Rinpuia thubuai hi ngaihtuah a nih chhungin bail a chhuah vawi engemaw zat dil a ni a, mahse hnawl a ni leh \hin. MTTA lam an beidawng duh lova, tin, social media kaltlangin Rinpuia Puitu Group insiamin anni hian sum te an thawhkhawm a. Rinpuia thubuai hi theihtawp a kalpuiin thiam channa an sual chhuak.