- Robert Zoliana
A hmasa berin thu-tlukna siam hman-hmawh thut thut chi a ni lova, mahnia tawpna lo siam ngawt chi pawh a ni hek lo. Rilru fim takin!
Naupai hi hlim taka lawmna tham a tling a, chutih laiin, tum loh puia naupai i nih chuan rilruhahna leh beidawnna hi hneh a ngai ngei dawn tihna a ni.
Feeling chi hrang hrang a lo lut zut zut dawn a, chhuak nuk nuk pawh an awm ang.
Hetiang hunah chuan i harsatna tawn hi rin ai takin a lo khirh hle tih a takin i hmuchiang nghal tawh bawk ang.
Chi-ai suh
I dihmun kha a mangan thlak hle dawn tih a chiang reng a, thinrim leh inthiam lohnate avangin i tap vak vak pawh a ni thei.
Amaherawhchu, chi-aina tur hun erawh a ni lo. Zahna, mualphona, pawi tihna leh mite hnuchhawn hial nun pawh i hmang mek te pawh a ni ang. Nimahsela, he dinhmun hi hringnuna ’emergency’ i tawn vawikhatna a ni lo tih hrereng ang che.
I dinhmun leh thil thleng pawm ngam rawh
Nagmah i inngaihdam pumhlumna kha thil pawi-mawh em em a ni a. Thil thleng kha pawm harsa ti hle mahla, pawm ngam tum la, a nghawng leh tuhrah seng ngam tur pawhin rilru siam la, van-duaina zawng zawng i bur khum bik lo tih ring tlat ang che.
In mawhchhiat suh
Nangmaha awm zahna, sual intihna leh thinrimna kha awlsamtein a kiang mai dawn lo tih hria la, chutih laiin, rilru chhunga pai ut ut ai chuan amaha an kal liam mai phal sak ang che.
Tho la, ding tawh rawh le, i nuna danglamna leh thil thar lo thleng tur hma-chhawn ngam turin i pen-chhuah a hun ta.
Mawhphurhna la
ngam rawh
Thiam lo intihna leh dik lo nia inhriatna i hneh hnuah tun dinhmuna i mawhphurhna kha i hlen ngam tawh tur a ni a.
Hun kal tawh ngaihtuah lovin, a behbawm leh neuh neuhte pawh kalsan tawh ang che. Zawi muangin tháw la vang vang la, inring tawk takin penchhuak rawh le.
Zirlai zirchhuah a hun
I hmalam huna zirlai pawimawh tak i chhar chhuah theihnan harsatna atang khan thil hlu tak hmuhchhuah ngei tum la, tun hnu-ah a thlen tawh lohnan leh fimkhur lehzualnan phaw ah i hmang tawh mai dawn a ni.
Siamtu kuta inhlan thar
Engang pawhin lo sual tawh mahla, engang mihring pawh niin, i dinhmun leh nihna chu mualphothlak tawpkhawk pawh ni se, Pathianin a la hmangaih reng che a, i manganna, beidawnna leh lungngaihna hi a hriatpui che a, thlamuan tur chein a inpeih reng a, i nihna ang ang khan pan mai rawh.
Thlamuanna thar dil la, ui lo leh phal taka pethintu chuan i mamawh a pe dawn che a ni.