aIZAWL: Mizoram Pig Farmers’ Association (MIPFA) chuan vawk pul hri, African Swine Fever (ASF) a darh leh mek laia dan lova vawk la luttute Police te’n an man thei lo chu mak an tih thu an sawi.
Hemi chungchanga thuchhuah an siamah MIPFA chuan state pawn atanga vawk la lut turin sorkarin dan zawm tur fel tak a duang a, hetihlai hian dan zawm lova vawk lakluh a tam chho leh hle tawh tiin, hemi avang hian tun hnaiah Mizoram khaw thenkhat leh Aizawlah ngei pawh ASF hi hmuh a ni leh tawh tih an sawi.
Hemi chungchangah hian MIPFA hruaitute’n Vety department Minsiter Dr K Beichhua pawh an hmuh thu leh Minister hian dan lova vawk lak luhte check pui a, dan bawhchhiate chu Police hnena report turin thawhpuiah a lo ngen tih MIPFA thuchhuah chuan a tar lang.
Minister in a ngen angin MIPFA member te chu March ni 17,2022 tlai atangin Sihhmuiah an duty a, nimin zing khan khan dan loa vawk lak luh phur, lirthei an man chu Zonuam Police Out Post-ah an hlan tih sawiin, Police te erawhin DC atanga order an hmuh loh avangin dan pela che te chu an leh chhuah leh ta ringawt tih an sawi.
MIPFA chuan, dan lova vawk lakluhte man tura DC tinte hriattirna pek vek an nih tawh laia Police lamin an man thei lo chu fel lo an tih thu sawiin, Police lamin Order an lo la hmu lo anih chuan Out Post tinte chu rang taka Order pe turin sorkar an phut tih an sawi.
“Dan lova Vawk lakluh hrim hrim Police-in an man thei lo hi akhawi lai ber hi nge dik lo tih sorkar kan zawt nghal bawk,” tiin MIPFA thuchhuah chuan a tar lang bawk a ni.