Ukraine band lar Antytila chuan karleh maia Birmingham, UK-a neih tur, ‘Concert For Ukraine’ -ah tel ve ngei an duh thu Ed Sheeran hnenah ngenna an thlen.
ITV bultuma Disasters Emergency Committee (DEC)-in Ukirane mipuite tana tanpuina leh chhawmdawlna concert lo awm turah hian rimawi khaw-vela artist lar leh langsar tak takte an tel dawn a, music instrument dah thla a, ralthuam hum ta Antytila band member te hian Facebook katlangin Sheeran hnenah hian tel ve ngei an duh thu an hrilh.
Band member te hi an ram khawpui Kyiv humhimna lamah chhun leh zan zawmin an duty ngawrh hle.
“Hello Ed Sheeran, Kyiv khawpui atangin chibai le. Ukrainian band Antytila-a musician te kan ni a, Ukraine rama band lar ber te zinga mi kan ni a, kan ramah leh khawvel hmun dangah te pawh fan kan nei tam hle.Stadium khattlatin concert kan nei thin.
“Indona in kan nun a thlak danglam thawk a, tunan hian kan ram runtu Russian ho lakah ralhtuam kan chelek mek a ni. British mipuite leh i chungah kan lawm a, min thlawpna zawng zawng-ah lawmthu sawisen loh kan nei. Kan lawm ngawih ngawih a ni tih hi min lo hriatsak ula, kan duh a, kan hrereng tawh dawn che u a ni.
“Vawiinah hian Ukraine tan charity concert a awm dawn tih kan lo hria a, Birmingham khawpuia neih turah hian tel ve kan duh hle. Kyiv leh Birmingham atanga LIVE broadcast nei turin kan inpeih a. Kan band hian Kyiv khawpui atangin kan rawn inlan ang. He khawpui hi a la tlawm lova, Russian ho lakah a tlawm ngai lovang.
“Bomb karah music play kan hreh reng reng lova, music kaltlangin khawvel hriatah Ukraine hi a chakin a huaisen a, hneh theih a ni lo, tih lantir kan duh. Kan bei zel dawn a, min thlawp tlattu khawvel mipuite hmaah hnehna hla kan sa ngei dawn a ni,” tiin video message an thawn.
‘March 29 atan kan inpeih e’ tiin tawp an khar.