An ram tana thla 9 hnua a inkhelh leh hmasak berah Denmark midfielder Christian Eriksen chuan goal khung turin minute hnih bak a mamawh lova. Netherlands nen friendly inkhelah goal khungin a kir.
Kum 30 mi Eriksen hian nikum June thla a Euro 2020-ah inkhelh laiin khelmualah nikhaw hre lovin a tlu a. A lung lam harsatna avangin a nunna chan teuh hle in khawvel football a barakhaih hman hle.
Khawvela midfielder \ha ber zing ami hian Amsterdam-a Johan Cruyff Arena-ah inkhel entute lawm a hlawh a. 4-2 a Netherlands chakna inkhelah hian Dutch fans te pawhin an khingpui player hi an lo lawm hle a. Club football-ah a lo inkhelh fo tawhna stadium-ah mipui thawm a ring.
Eiksen hian kumtir khan Premier League club Brentford a zawm a, tunhnaiah ram tana inkhel tura ko kir a ni leh.
Second half \an tirah dah luh a ni a, minute 47-naah Andreas Skov Olsen ball pek chu mawi takin goal-ah a pet kual lut a, goal khung nawn teuh hle in penalty area hmawr a\anga a pet kual chuan goal ban a fuh bawk.
“Ka hnena ball a lo kal kha ka lawm a, ka pet kual luhdan a \ha hle in ka hria. Ram tana ka lo kirleh dan duhthusam a ni.” tiin inkhel zawhah Eriksen chuan a sawi.
Netherlands tan hian Eriksen-a club hlui Tottenham a khel mek Steven Bergwijn chuan an goal hmasa ber leh hnuhnung ber a khung a. Ani goal hnih inkarah Netherlands tan Nathan Ake leh Memphis Depay te chuan goal an khung a. Denmark tan Jannik Vestergaard chuan goal khat a khung ve thung.
Eriksen hi a lung lam vangin a taksaah implanted cardioverter-defibrillator vuah a ni tawh a. A club khelhna Inter Milan chuan Italy-ah ICD vuah chungin infiammi inel phal a nih loh avangin a inkhelh chhunzawm theihna turin a contract December thla khan an titawp a. Brentford hnenah thla ruk contract a ziak zui.
“Helai hmun hi inkhelh nawmna a ni a, chu mai bakah ka lo kirlehna a inkhel hmasa ber ka khelhna hmun a ni thei hi ka tan a hlu hle. tiin a sawi bawk.