Mi firfiakten Jammu & Kashmir-a Budgam-ah police chhungkua a beihnaah unau mipa pahnih an thi niin Pathianni khan thuneituten an sawi.
Police chhungkaw beihna hi Inrinni zana thleng kha niin mi firfiakte hian Budgam-a an chenna in chu an luhchilh a, an kap a, Special Police Officer (SPO) Ishfaq Ahmad Dar thi nghalin a unaupa, Umar Ahmad chu na takin a hliam thung.
Umar Ahmad-a pawh hi Pathianni tuk khan a hliam tuar lovin a thi veleh ta a ni.
Budgam-a Chadbug khuaa Pathianni veka an unau vuina hun hmangah mi sang chuang an tel a, an zingah hian police tam tak an tel bawk.
Vuina inkhawmah hian an chhungkaw zinga pakhat chuan an chhungte thah an nih avang hian an khua chu an chhuahsan nghal tur thu a sawi a. An chhungkuaah hian police pathum lai an awm a ni.
Tun tuma thil thleng hi Kashmir phaikuama tun thlaa mi firfiakte chetna tharlâm ber a ni a. March thla tir khan hmun thuma beihnaah Panchayat member pathum chu that an lo ni tawh a, Thawhlehni liam ta maiah khan Srinagar-ah patroling an neih laiin mi firfiakin police pakhat a that bawk.
Budgam district-ah tun thla chhunga mi firfiakten police chhungkua an beih vawi thumna a ni bawk a. Kashmir lailia awm, Budgam district-ah hian hmun dang ang lo takin firfiaka chetna a tlem thin a; mahse, tun hnaiah a tam thar hle a. Tun hnai lawkah pawh khan Budgam-ah tho hian sipai pakhat ruk bova thah zui a ni.