Rimawi khawvela drummer tha ber zingami Foo Fighter khuangpu lar tak, Taylor Hawkins chu kum 50 mi niin, a thi.
Kum 20 chuangzet Foo Fighter tana chehchuak tawh hi South America khawmualpui an hrut mek laia vanduaina tawk ta a ni a, 1997 kuma ‘The Colour and the Shape’ album peihfel hnu-a band zawm ta kha a ni a, a kuthnu leh sulhnu te hriatreng a ni tawh ang.
Band-in thuchhua an siamah, ‘A rimawi thlarau leh a nui ngainatawm tak hi kan zingah a cheng kumkhua tawh ang. A nupui fanau leh chhungte kan tawrhpui em em a, hun harsa tak an tawh mek lai hian an mimal thil te zahsak turin mitin kan ngen a ni, an ti.
Bultanna
Foo Fighter band hi 1994 khan Dave Grohl hova din a ni a, Nirvana zaipu Kurt Cobain intihhlum hnu-a an khuangpu ni bawk Dave-a’n khawvel eng a hmuhpui a ni.
Dave hi Nivana band-a khuangpu a ni a, band tharah hian lead oval changin guitar a kuah nghal bawk. A hun laia band lar ber zingami hmunruak luah a, khuangpu nih zui nghal chu Taylor an pawh hna hautak leh chona namen lo a tling pha.
Anni pahni hi band-a an awm chhung zawngin an khuangrual dun hle a, concert thenkhatah phei chuan nihna leh chanvo te inthlengin, Taylor a zai fo a, Dave pawhin khuang a pu leh zauh thin bawk.
Foo Fighter band a zawm hmain Dave hi Alani Morissette tan drums a vaw thin a, hetah pawh hian hming a chher tawh.
Kum 2001 daih tawh khan London-a an zin tumin Dave hi a OD thut mai a, kar hnih lai chu nikhaw hre lovin a awm. Hemi chungchang hi 2018 khan sawichhuakin, khata tang khan a nun a inthlak thleng hlawk nghal, a ti.
SUNNA LEH UINA
Milar leh hriathlawh tak takte’n Taylor Hawkins thlahna hnuhnung an sawi hlawm a, Rage Against the Machine rocker Tom Morello chuan, “Pathianin malsawm che rawh se. Taylor Hawksin, i thlarau leh tawpin tai nei lo i rock pawer kha ka va ngaina tak em! Thianpa, muangin chawl ang che,” tia a thlah laiin, Ozzy Osbourne pawhin, “Mi ropui leh msuician mak danglam tak a ni,” a ti ve bawk.
South America an hrutnaa festival line-up-a a telpui Miley Cyrus rilru a na ngawih ngawih. “Hla a play laia a bul maia lam kha a va’n nuam em, ka hrereng awh ang. Play nawn zel rawh aw, kan nui dun lai te kha a tawp mai mai lovang,” a ti.
Beatles drummer hlui Ring Star pawhin ‘Pathianin malsawm che rawh se,’ tiin a thlah.
Kiss member Gene Simmons tan channa nasa tak a tling. ‘Min barakhaih a, rilru hi a na vawng vawng mai a ni,” a ti ve bawk. Smashing Pumpkins, Nickelback leh The Offstpring te pawhin sunna thu an tarlang bawk.