Myanmar tual chhung buaina kal zelah Chin state-ah Myanmar sipai leh mipui sipaite an inkah fo avangin ramri depa awm, Zokhawthar bul vel a ralmuang lo hle a, Inrinni khan Zokhawthar bul, Myanmar ram chhunga Khawmawiah inkahna nasa tak a thleng.
Zokhawthar Branch YMA President Thankunga Pachuau hnen a\anga The Zozam Times thudawn danin, March 26, 2022 khan Rihkhawdara Myanmar sipai awmte chuan India leh Myanmar inrina gate bula CNDF (Chin National Defence Force) awmte chu an mut laia hualin an kap thut a ni.
|iau kama inkahna thleng hian Zokhawthara in pahnih pawh silaimuin a bang a deng niin Zokhawthar Branch YMA president chuan a sawi.
Zokhawthar YMA hruaituten an sawi zel danin he inbeihnaah hian CNDF-ten an luah lai checkpoint chu Myanmar sipaite hian lain, CNDF sipai pahnih chu Mizoramah an tlan lut nia hriat a ni a, hliam tuar pahnihte chu Champhaiah enkawl an ni.
Myanmar sipai leh CNDF inkap thawm hi Zokhawthar a\angin a hriat theih vek a. An inkah hun hi zing dar 4:30 bawr vel a ni a, a chan chhe zawka \ang CNDF mite an tlanchhiat hnu khaw varah Myanmar sipaite chuan Khawmawi khaw chhunga bungrua leh lirtheite chu lakhawmin an hal a, Zokhawthar mipuiin an thlir \hup niin Thankunga Pachuau chuan The Zozam Times a hrilh.
Zokhawthar YMA president chuan he inkahna vang hian raltlan an awm belh an hriat loh thu sawiin, tun hnaiah Khawimawi khuaah hian inkahna a lo thlen fo tawh avangin Khawmawi khuaah hian cheng an awm tawh lo a, Zokhawthar leh Mizoram chhung khaw dangah an lo tlan lut deuh vek tawh tih a sawi.
Myanmar sipai leh mipui sipaite inkahna avanga an sahimna zawnga raltlante hi Zokhawthar VC leh YMA-ten lo buaipui \hin a, kudam leh hmun ruak remchangah an riahtir thin a ni.
Tun dinhmunah Zokhawtharah hian Khawmawi khuaa awm zawng zawngte raltlan deuh vekin, mi 5,000 chuang an awm mek a ni.