Auto Corner
by Ruata
Hyundai Creta elpui ni mek South Korea company lar Kia lirthei, Seltos chu tunhnaiah a chhuak thar tur 2022 model kawngpuia an enchhin lai thlalak a darh leh ta chuai chuai mai a. He midsize SUV thara kan hmuh tur hrang hrang a rawn tilang a ni.
Kia Seltos hi South Korea company pahnih Hyundai leh Kia company ten thil hrang hrangah thil inang leh thuhmun – a khawl, platform leh thil dang dangah an neih tir a. Market lamah pawh midsize SUV hralh kal tak mai an ni dun mek a. Seltos 2022 model lo awm tur hian India rama lirthei leitute pawh a tiphur viauin a rinawm a ni.
Kia lirtheite hi Mizoramah pawh kan hmu tam ta viau mai a. Mizote mil tak lirthei te pawh a tih theih ang a. A changkangin a mawi em em a, kan la duh telh telh dawn ni te pawhin a lang a. Hetianga a chhuak thar tha lehzual leh changkang lehzual a chhuak zel te pawh hi la lei zel tur te tan a tha em em a ni.
2022 Kia Seltos
Kia Seltos thara kan hriat theih chin leh hmuh theih chin te kan tarlang ang a. Seltos thar tur hian honeycomb design grille thar, brushed aluminium insert awm a nei dawn a. Projector headlamp, LED DRL chi thar a nei tel dawn bawk a, hei hian a landan pawh a ti thar lehzual a ni. A hmaa awm ang a hma bawr design, Kia ho signature tiger nose design chu a la put chhunzawm zel dawn a. A ke bawrah five spoke grey alloy wheel a la neih chhunzawm zel dawn bawk a ni. Hei bakah hian a hnung leh hma bumper te an rawn tuaithar ang a. A hma bumper-ah hian a air dam chu an rawn design danglam deuh tawh dawn a ni. A hnung bawrah hian Kia Seltos thar tur hian wraparound taillamp thar a nei dawn a, hetah hian a man to ho tan LED element a awm tel dawn bawk a ni.
Hmanraw changkang tak takin 2022 Kia Seltos hi an rawn thawm beisei a ni a. Heng zingah hian 10.25-inch touchscreen infotainment system, smartphone connectivity thar ber keng tel bakah 360 degree camera te a tel tawh ngei beisei a ni a. Khawvel hmundanga tihchhuah mek Kia K3 in a hman ang full digital instrument cluster chu a hman beisei a ni bawk.
Heng bakah hian kentel hrang hrang – connected car technology chi thar, upholster thar, steering wheel leh switchgear thar, electric panoramic sunroof leh adangte kan hmuh tawh hmel a. Thuthang awm mekah chuan Kia Seltos 2022 hian lirthei changkang hoa kan hmuh ang – ADAS (advanced driver assistance system) – autonomous emergency braking system, blind spot monitoring, adaptive cruise control, lane assist leh thildang dang kengtel chu a rawn nei maithei bawk a ni.
A khawl lamah chuan inthlak a awm lemloh hmel a, a khawl ngai a rawn hman leh beisei a ni. He SUV hian tunah hian 115bhp power pechhuak thei 1.5 litre naturally aspirated petrol khawl, 140 bhp power pechhuak thei 1.4 litre turbo petrol khawl leh 115bhp power pechhuak thei 1.5 litre diesel khawl te a hmang mek a.
Hei tho hi 2022 model-ah pawh hian kan la hmuh hmel a, a khawlah hian thlak ngai a la awm lo a, a tha thawkhat rih viauah company in a ngai a ni ngei ang. A khawl mai bakah hian transmission lam pawh a ngai ang vek a la nih beisei a ni.
Thil la chiang mai lo, Seltos tharin a neih ve beisei deuh chu mild hybrid system a ni a. Hei hi a hmang a nih chuan boruak chhia a pekchhuah lam a rawn ti tlem lehzual ang a, lirthei boruak chhe pekchhuah dana inkhuahkhirhna CAFE leh BS6 update thar chu a rawn zawm thlap dawn a ni.
Kan han tarlang tak te hi lo hmuh lawk theih leh lo beisei lawk thil te a ni hlawm a. Reiloteah Kia chuan thu an rawn neih a rinawm a. Chiang, fiah leh dik zawkin 2022 Kia Seltos chungchang hi kan hre thei thuai tawhin a rinawm a. Kia Seltos lo lei tumte tan chuan nghah hret chi a nih hmel a. Reiloteah Kia atangin SUV tha leh changkang tak an neih mek chu a tha lehzual leh a changkang lehzualin kan hmu leh dawn niin a lang a ni.