Canada mipa football team chuan Jamaica 4-0 a an hneh avangin kum 36 chhunga a vawikhatna atan mipa FIFA World Cup an khel dawn.
Thawh\anni zinga Toronto a BMO Field a inkhel result avang hian Canada hi FIFA World Cup Qualifying – CONCACAF ah final stage a ram pariat inel zingah a sang pathum zingah an tel dawn chiang a. Kumtawpah Qatar an pan dawn.
Canada tan hian Mexico 1986 hnua World Cup an khelh leh hmasak ber tur a ni a, hemi \um hian goal khung miah lovin an group-ah a mawng berah an awm.
Jamaica lakah Canada tan forward rinrawl Cyle Larin leh hmabak eng Tajon Buchanan ten goal an khung a. Second half-ah veteran Junior Hoilett leh Adrian Mariappa own goal an neih belh.
An coach John Herdman chuan, “World Cup khel turin kan tling a, he ram hi football ram dik tak a ni. Team ka enkawl hmasak berin World Cup khel turin kan tling dawn tih ka sawi lawk a, a tirah min awh lo mahse a tak ram a chang a, kan fans ten an nghak rei tawh a, ka lawmpui hle.” a ti.
Canada an chhe lo
Khawvel football tehnaah ram lian an ni lova, mahse Canada men’s national soccer team hian tunhnaiah player-ah hma an sawn.
An star player Bayern Munich tana veilam kil a rinrawl Alphonso Davies chu a lung lam avangin la inkhel thei rih lo mahse Canada hian player pawimawh an nei nual.
Lille striker kum 22 mi Jonathan David chu tunhnai kum hnih chhunga Europe club liante ngaihven hlawh a ni a. Besiktas forward Larin pawh an mi pawimawh a ni.
Jamaica lakah goal khung Buchanan hi Belgium-ah Club Brugge tana forward niin France-ah Ligue 1 a khel mek Ike Ugbo pawh an kawl.
Anni bakah Premier League a khel tawh Junior Hoillet chu an player tawnhriat nei \ha a ni a. Besiktas a khel captain Atiba Hutichison leh Red Star Belgrade goalkeeper Milan Borjan ten a hnung lam an kaihruai thung.
Major League Soccer team an ramin pathum an nei a, an ram in league a kalpui bawk. Europe a inkhel player an kawl nual bawk a, tualchhung player te nen qualifying a che \ha tak team an nei hi thil mak a ni lo.