- Rinfela Zadeng
Hripuiin khawvel leh Mizoram min nuai a, thil chi hrang hrangah kan buai a. Puipunna lam chi – inkhawm, sikul, infiamna adt te pawh kan khar a. Hripui nena nun thiam a tul zia kan hre chho zel a; vawiinah pawh hian Hripui karah inkhawm te, sikul kal te leh kan eizawnna te chhunzawm turin hma kan la chho mek a. Mizoramah pawh sikul kal kan tum tawh a; keini zirlaite hian sikul kal chunga Social Media hman thiam pawimawh zia hi kan hriat chian a ngai hle mai. Vawiinah hian zirlaite tan bik Social Media hman thiam a tul zia hi kan sawi dawn a ni.
Social Media hman thiam
Mizorama thalai tam zawk hian Social Media kan khawih a, Instagram, Facebook, Twitter adt -ah account kan nei deuh vek ti ila kan tisual awm lo e. Mizo te chauh ni loin khawvel pum huapa mi ropui leh langsar, sorkar ropui leh company lian, infiamna lam te leh mi zawng zawng hian Social Media kan khawih ti ila kan sawi sual lo ang. Chuvangin Social Media hi do chi a ni tawh lo a; Sorkar leh Kohhran te pawhin tangkai taka kan hman thiam hi kan inzirtir a hun tawh zawk a ni. Thalaite leh mi nawlpui te hnena zirtirna leh thil tha kawhhmuhna atana Social Media hman thiam hi vawiina kan mamawh dik tak zawk a ni. Chutianga hmang thiam leh hmang tangkai hmasa apiang te chu mi fing an ni chho mek zel bawk.
Kan mamawh zawn
Kan thupui hi zirlaite tan bik a nih angin zirlaite’n tangkai taka Social Media kan hman thiam a tul zia hi sawi ta bik ila. A bikin Instagram hi kan khawih nasa a, kan ngaihsan zawng te leh kan duh zawng te kan ban phak theihna hnai vai ber ‘application’ a nih vang te pawh a ni ang e. Nula/Tlangval chhe lo leh sexy tak tak te Instagram lama kan follow rual hian kan lehkha zirlai min tanpui thei tur follow nachang hriat hi nakina kan inchhir lohna tur a ni. Mizo tawng pawhin hetianga zirlaite pui thei tur Instagram page hi a awm chho nual tawh a. Hetiang ho chi hi mi lar te leh nula tlangval hmeltha/sexy te ai hian follwers an nei tlem zawk fo thin a. Chuvangin zirlaite hian kan duh zawng bakah kan mamawh Instagram page te hi follow nachang i hre mawlh ang u.
You Tube Channel tha
Mizoram chhung chauh thlir pawhin You Tube channel tam tak kan nei tawh a; zirlaite hian eng You Tube channel nge kan en tam ber? Kan ngainat zawng leh kan mit châk zawng kan en rual hian kan zirlai tana tangkai You Tube Channel i subscribe ang u. Kan hmalam hun zel atana tangkaina leh hmasawnna min pe miah lo tur thil ngaihven tam lutuk hi kan bansan then loh chuan nakinah kan ram leh hnam hian a la tuar dawn a ni. Pasaltha thawnthu te, BTS Army ho You Tube channel te kan en rual hian kan hmalam hun atana tangkai tur You Tube channel – Sap tawng leh Mizo tawng te pawh hi i ngaihven ang u. Hetiang channel tangkai, zirlaite eizawnna leh hna ruak awm an sawina channel te, BBC, CNN, DDK, Zonet leh LPS adt news channel kan en tlem lutuk te hi zirlaite hian vei ila, i ngaihven mawlh ang u.
Mobile Apps tangkai
Vanglaini Chanchinbu hian a thlawnin Application kaltlangin Vanglaini chanchinbu chhiar tur hi nitin min pe tih te hi zirlaite hian kan hriain kan chhiar ngai em? PUBG leh ML te kan khelh rual hian Kindle apps a\angin lehkhabu kan chhiar ngai em? Zozam Times leh Aizawl Post te hian website lamah an chanchinbu hi an dah chhuak tih te hi kan hria em? Thingtlangah chanchinbu thlen phak lohna hmunah kan awm a nih pawhin heng a chunga kan sawi te bakah pawh khian kan mobile phone hmangin chanchinthar, kan zirna kawnga hmasawnna tura min pui thei tam tak a awm a ni tih hriain tan ila ang u. IAS/IPS, Central Service adt ah kan tlin theihlohna chhan ber pawh hi heti lamah hian zirlaite hian kan rilru kan pek tawk loh vang leh kan ngaihven tawk loh vang hi a chhan pakhat a ni.
Chanchinbu leh lehkha chhiar taimak
Zirlai – chanchinbu leh lehkha chhiar tem kan nih chuan kan lo pass ve a nih pawhin kan ropui tak tak ngai lo ang. Tunlai khawvelah mi thiam tak tak tan lo chuan hna thawh tur tha hmuh a harzia hre tu zirlai te kan ni. Chutianga mi thiam leh chhawr tlak ni tur chuan Social Media kan hman dan kan her rem thiam a nih phawt chuan kan theih lohna tur a awm lo. Social Media awm hmaa lehkhabu tha leh zirlaibu tha lei tur awm lo leh ban phak maia a awm lo thin kha Social Media lamah lei tur leh a thlawna chhiar tur tam tak a awm tawh. A ngaihven leh a hai chhuah erawh zirlaite hian kan bat leh kan mawhphurhna a ni. Chutianga haichhuak leh a nachang hria zirlai tam tak kan nei te hi a thlamuanthlak hle.
Nu leh pa te mawhphurhna
Nu leh pa te hian kan fa lehkha zirlaite hi nasa leh zuala tan kan lakpui a ngai hle. Keimahni ngei hi entawn tlakin nung hmasa ila, kan fate kan thunun leh zual thei ang. Pathian laka kan rochan kan fate hi sikul an kala lehkha an zir a nih chuan theihtawp i chhuah pui zual ang u. Kan fate Social Media hman dan te hi a theih chen chen hriatpui ila, an hmasawnna tur zawnga Social Media an hman thiam theihna tura tanpui leh zirtirna pek te hi kan bat a ni tih hre nawn mawlh ang u. Social Media-a thil tangkai lo leh an nun tichhe thei thil lakah te hian kan fate i veng ang u. Sex video an neih tawh hnua inzilh ai chuan sex video nei lo tur leh sex hmang lo tura inzirtir hi a nih dan tur dik tak leh Pathianin kan fate enkawl tura mawhphurhna min pek dan a ni.
Zirlai kan nih chuan Social Media kan khawih pawhin kan zirlai min pui thei tur ngaihven tel ila. Kan duh zawng leh kan ngaihsan zawngte thlauthla chuang si loin Instagram, Facebook, Twitter, You Tube adt te hi hmangin khawih ila. Hlawhtlinna kan chan hunah chuan Media leh Social Media hian min la umzui ang a; ram leh hnam tana mi tangkai leh chhuanawm kan lo ni ang.