Ei tur, tuialhthei leh power an tlakchham avanga president chenna in tuala Sri Lankan mipui lungawi lo pungkhawmin tharum an thawh avangin police chuan curfew puangin mittui tlakna hlo an kap chhuak.
Lungawi lo pungkhawmte hian Ningani zan khan anmahni dalna (barricade) paltlangin bus an hal nia sawi a ni.
President Gotabhaya Rajapaksa chuan hetianga chete hi ‘hleihluak tak rilru pu’ niin a sawi.
Sri Lanka hian ram dang nena an insumdawn tawnnaah harsatna tawng mekin hei hian an ram eibar dinhmun a tichhe hle.
Darkar 13 zet power neih loh te, tuialhthei awm lo te, ni tin mamawh leh damdawi awm lo te chuan vantlang a tithinrimin tunah hian a vanglai a tawng mek a ni.
President chenna in bula lungawi lohna lantir hi a tirah chuan a muanawm hle a; mahse, a hnuah tharum thawhna thlengin police-in a hnawh darh nan mittui tlakna leh tui laipuiin an phut a, \henkhat chu an vaw bawk.
Mipui thinrim hian chhang letin police hi lungin nasa takin an vawm.
Zirtawpni tuk khan police chuan mi 45 an man a; mahse, thubuai engmah an siamsak lo.
Kum 2019-a hneh taka thlan tlin, Rajapaksa hi mipuiin duh hle \hin mah se tunah hian a lakah an thinrim hle a, an ram ngialnghehna leh hmasawnna a tiam ang a thlenpui rih lo.
Sawiseltute chuan a sorkarah hian ei rukna leh induhsakna a nasa niin an sawi a. A unaute leh a laichin hnai eng emaw zatin ministry pawimawh an enkawl a, hei hi an ramin tun dinhmun a thlen chhan pakhatah an ngai.
Chanchinbuah president leh a minister-te hian power neih loh an nei lo va, a chhungte pawhin an hausakna an chen mek nia tar lan awm \hinte chuan mipui a tithinrim zual.
Sorkar chuan heti taka an harsat chhan hi hripui lengin an ram sum hnar pakhat, khualzin a dan vek vang niin an sawi a. Ram dang sum an lak luhna ber pakhat, khualzinte hi kum 2019 Isua Thawhleh Nia beih an tawh avang khan an \i a, hei hian tlawhtu a tihtlem phah bawk niin an sawi.
Hetih lai hian mi thiamte chuan sorkar chhuanlamte hi thil rei deuh tawh a ni a, insiam remna hun a awm tawh niin an ngai thung.