Ukrainian helicopter-ten Russia khawthlang lama tuialhthei chhek khawlna hmun chu an bomb niin he laia regional governor chuan Zirtawpni khan a sawi a, a dik a nih chuan Kyiv-in Russian leilung a kah vawi khatna a ni ang.
Russia-in Ukraine a rûn ni 37-naah chiah he thil hi a thleng a. Russia-in a rûn avang hian mi sang chuang thi tawhin mi maktaduai 10 chuangin chenna tur mumal an neih loh phah a. Indopui II-na hnu lama Europe-a vakvai an tam ber \um a ni.
Ukraine-in Russian khua, Belgorod an kap tih puan hi ram pahnihte an innghirngho hnua Ukrainian-ten an indopui ram chhung thlawhna hmanga an beih hmasak ber a ni.
“Ukrainian army helicopter pahnih chu hniam taka thlawkin Russia ram an dai a petrol kapin nasa takin kangmei a chhuak a ni,” tiin Belgorod region Governor Vyacheslav Gladkov chuan messaging app Telegram-ah a tar lang.
Kangmei chhuakah hian thawktu pahnihin hliam an tuar a niin a sawi bawk.
Kang\helhtu mi 170 velin an \helh a, emergencies ministry chuan zing dar 6:00 (India sanaa zing dar 8:30) vela kang \an niin a sawi.
Ministry-in video an tihchhuahah chuan kang hi nasa hle a, van lamah meikhu dum leh var a invawrh chho nasa hle.
A hmun neitu, Russian energy giant Rosneft chuan thawktute chu an thiar chhuak vek tawh tih a sawi.
Tuialhthei chhekna hmun a kan avang lirthei eng emaw zat chu a tui thun tumin filling station-ah an intlar nghal a; mahse, governor chuan buaina tur a awm lo va, petrol chu mamawh khawp an chhek sa niin a sawi.
“Tuialhtheiah buaina tur engmah a awm lo, kan ngah sa,” tiin Gladkov chuan a sawi.
Tun kar kirah pawh khan Belgorod-ah tho hian ralthuam dahna hmunah thil puak a awm tawh a; mahse, thuneitute hei hi engvanga thleng nge tih an sawi lo.
Belgorod hi Russia leh Ukraine inrina a\anga Russia lam km 40 vel chauhva hla niin Ukrainian khawpui lian, Kharkiv a\ang pawhin km 80 vel chauh a ni a. Kharkiv hi Russian sipaiten February 24-a an run hnua an beih nasat ber pakhat a ni.
Russian defence ministry chuan Ukraine-a beihpui an thlak zelah sipai hmun paruk an tichhia niin a sawi a, heng zingah hian puak thei, rocket leh laipui dahna hmun pawh a tel tih a sawi.