MCL 2022 Auction-ah team leh player lei nan Rs. 9,70,700

Mizoram a cricket inelna sang Mapuia Memorial Mizoram Cricket League chu Covid 19 hripui avanga kum hnih \hulh a nih hnuah kuminah buatsaih a ni dawn a. Player leh league a team hmun hnih awmte lilamna hun neih niin Bawngkawn South Cricket Club leh Luangmual Cricket Club ten MCL khel turin ‘team slot’ pahnih an lei.

MCL khel tur pahnihte
Inrinni zana Aijal Club a MCL 2022 Auction-ah hian MCL khel tura tling tawh team palite kianga khelh theihna hmun hnih zawrh a ni a. Team slot hi team panga in an chhang.
Team pakhat hi Rs. 50,000 a zawrh chhuah \an niin lilam hmasak zawkah Bawngkawn South CC leh Luangmual CC an inlan chho ngat ngat a, Rs. 3,60,000 in Luangmual CC in an chang.
Team slot pahnihnaah Bawngkawn South CC in chan ngei an tum a, team thar ni tur Holiday Palace Blasters chuan Luangmual leina zat in ngam mahse Bawngkawn South CC in Rs. 3,90,000 in an chang.
Zarkawt Lords, Durtlang CC leh Holiday Palace ten team slot an chang zo lo.
Player lam
MCL khel tur teamten an club a player nilai an chelh zui vek thei a. Team thar ni tur pahnihten auction a chhawpchhuah player an duh pahnih ve ve an phochhuahna man Rs. 3000 in an la nghal thei.
Luangmual CC in B. Lalnunfela leh Abhay Jaishi an thlang nghal a. Bawngkawn South CC in Zomuansanga leh Moses Ramhlunmawia an thlang.
Club pakhatin lilamna aṭanga player lei nan Rs 60,000 aia tam lo an hmang thei a. Player lilam zingah 20 hralh chhuah a ni a, heng mite lak nan hian club parukin Rs 2,20,700 an hmang. Player-te hian club-in an lak luhna sum aṭanga 60% an chang ang a, an kalsan tak club-in 20%, MCL Governing Board-in 20% an chang bawk ang.
Bawngkawn South CC chu player lei hnem ber an ni a, player paruk lalutin Rs. 31,600 an hmang.
Zarkawt Lords bowler Lalrempuia chu player manto ber niin Rs. 37,700 in Luangmual CC in an lei a. Zarkawt Lords tana a khelhpui tho Rinsangzela chu Chhinga Veng CC in Rs. 34,300 in an chang ve thung.

Engtin zel?
Mizoram a cricket inelna sang a ni a. First Division a team \ha pali bakah team thar pahnihte inelna turah hian lawmman Rs. 6,00,000 sem chhuah a ni dawn.
Cricket Association of Mizoram Honorary Secretary Mamon Majumder chuan kum sarih chhung team \ha paruk inelna MCL kalpui a ni tawh tih a sawi a, hmasawnna thleng zel avangin sum tam zawk leh hlawhtling zawka buatsaih a nih theih a beisei.
“2012 khan MCL \an a ni a, LPS chhungkuain Mizoram cricket chawikan nan kum sarih a zawnin a sponsor a, kan hre reng tur a ni. Tunah chuan BCCI hnuaiah CAM a inziah luh tawh avangin sponsor a ngai tawh lo va, a hming pawh Mapuia Memorial Mizoram Cricket League tia thlak a ngai”
“MCL hnuhnung ber 2019 khan team paruk hnenah lawmman pawisa fai Rs 3,45,000 sem chhuah a ni a, tunah chuan Rs 6,00,000 sem ral a ni ang. Club senso tihtlem nan MCL governing board chuan jersey a tumsak vek dawn a, an inkhelh huna an ei leh in tur zawng zawng a tumsak bawk ang,” a ti.
MCL 8 hi April 11-ah Suaka Cricket Ground, Sihhmuiah khelh \an tur a ni a. Nilaini hian Aijal Club-ah fixture release neih a ni ang.

MCL 2022 AUCTION

MCL 8 TEAM 2 LILAMNA : Rs 7,50,000

• Bawngkawn South : Rs 3,90,000
• Luangmual : Rs 3,60,000

PLAYER LILAMNAA HRALH CHHUAH 20 : Rs 2,20,700

LUANGMUAL : Rs 43,700

1. Lalrempuia (Zarkawt Lords) : Rs 37,700
2. B Lalnunfela (Hunthar) : Rs 3,000 (MCL governing board-in sum a pek belh ang)
3. Abhay Jayshi (Gorkha) : Rs 3,000 (MCL governing board-in sum a pek belh ang)

BAWNGKAWN SOUTH : Rs 31,600

1. Lalrinfela (Zarkawt Lords) : Rs 10,300
2. Zoramthanga (Gladiators) : Rs 6,000
3. Arbin Sahi (Armed Veng) : Rs 6,000
4. Indra Kumar Chhetri (ILMOV) : Rs 3,300
5. Zomuansanga (Zemabawk Pitchers) : Rs 3,000 (MCL governing board-in sum a pek belh ang)
6. Moses Ramhlunmawia (Hunthar) : Rs 3,000 (MCL governing board-in sum a pek belh ang)

RAMHLUN VENGLAI : Rs 26,900

1. C Vanlalṭhafamkima (Zarkawt Lords) : Rs 23,600
2. Zorinpuia Hrahsel (Ramhlun Venglai Jr) : Rs 3,300

CHHINGA VENG : Rs 39,800

1. Rinsangzela (Zarkawt Lords) : 34,300
2. Lalthlanawma (Hunthar) : Rs 5,500

CHANMARIANS : Rs 39,500

1. B Lalchhuanawma (Gladiators) : Rs 25,900
2. Lalhruaitluanga (Hunthar) : Rs 10,300
3. Zoremsanga (Gladiators) : Rs 3,300

KULIKAWN : Rs 39,200

1. Lalhriatpuia Khiangte (Pacers) : 28,400
2. Lalzuitluanga (Zarkawt Lords) : Rs 4,200
3. Saroj Kumar (Hunthar) : Rs 3,300
4. Ajay Rai (Gorkha) : Rs 3,300