Zing thawh veleh en an tum nghal a, sikul ban veleh remote control an chuh nghal chat thin. In tin tih mai turah TV a awm tawh a, naupangte tan duhthlan tur pawh a tam tulh tulh a, chu chuan nu leh pate lu a tihai a, an mahni pawhin harsatna an tawh phah.
Naupang ‘channel’ Naupangte puala siam channel hrang hrang; Cartoon Network, Pogo, animax etc. ah te hian thil zirtur leh an hlimpui dar dar turte an chhuah thin a. Hengte hian an rilru-ah ring takin thu a sawi thei.
Thil hlutna leh pawimawhna thlengin engtiang chiahin nge an mahni-ah nghawng a neih a, nangmah ngei pawhina pawimawh i tihte chu engnge ni ta ang le?
DUHTHLANNA SIAMSAK
Eng channel nge an en thin a, eng hunah nge en thin se i tih? An duhzawng an thlang a, an en a nih pawhin hun bituk siam sak ngei ngei ang che.
FINNA LEH THIAMNA ATAN
National Geographic leh Discovery te pawh hi puitling mai ni lo, naupang pawhin an tuipui hle thova. An en laiin an bulah thu la, zawhna an zawh che chuan i hriat ang angin chhang la, thil awmdan leh nihphungte pawh hrilh thin a tha. (Hetah hian nu leh pate hi lehkha chhiar zau leh inzirmi tak ni thei se duhthusam a ni).
HUN BITUK SIAMNAAH
Nikhata an en theih hun chhung mumal tak siam sak te, karkhata an en theih hun tur te nen lam hunbi thliah sak hi a pawimawh hle. Zawhna an zawh che chuan a chhan leh vang mumal takin hrilhfiah ang che.
TV-A FAKNA NGHAWNG
Hengte hian an nunah thu a sawi ring hle a, hla thu leh music thlengin an hre kil kel vek a, TV-a fakna lo lang te hi lei a, neih ngei ngei an tum tawh thin. He thilah hian ruahmanna felfai tak i neih ngei a ngai dawn ta tihna a ni a. Chhungkaw hriselna leh sum leh pai dinhmun (budget) nena inmil tur te ngaihtuah pui hi thil tha tak a tling.
TIME TABLE DUANSAK
Naupangte’n mut-na hun tha an neih hi a pawimawh em em a, an mut hmâ hian thil dangin an rilru leh ngaihtuahna a la peng hle tur a ni lo. Tharum thawh tam em emna te an hmuh hian mut an harsat thin a, zanlaiah te an thangharh thut thut zel a, an hlau em em thin a ni. An mut hmâ hi chuan TV en tir lo la, thawnthu bu chhiar sak emaw, nasa lem lova infiampuite hi a tawk viau a, an that pui zawk.
THARUM THAWHNA LEH A NGHAWNG
TV-a an thil hmuh te kha pâwn lamah an chetchhuah pui anih chuan thil mak a ni hran lo. Hei hi chhungkaw tam takin harsatna an tawh langsar tak a ni a, dan leh zawm tur i siamte kha a ‘fair’ a, langtlang thei a nih bawk chuan luhlul a chhuah a rinawm lem loh.
CHANGKANNA HMAN THIAM
TV en that leh that lohna hi chu khawvel tawp thleng pawha la inhnial luih luihna tur a ni reng dawn a, a tak ramah phei chuan a buai lehzual a, tih leh tih loh tur ringawt pawh hi luhai na tham a tling.
TV hi computer leh mobile phone ang tho a ni a, awlsam te-a hman theih leh mi hipna ngah tak a ni.
Mihring kan nih chhung hi chuan kan hmang reng dawn a, chutih laiin heng thilte’n a thunun lohnan hun an pek dan zawka kha thunun zawk ni thei se, a tangkai a, a hahdam thlak zawk bawk.