Andhra Pradesh Chief Minister YS Jagan Mohan Reddy-a hnuaia cabinet member zawng zawng chuan Ningani khan an banna an thehlut a. Kum nga term-ah a chanve an thlen chiahin, kum 2024 inthlan thlirin an insiksawi burh dawn.
Cabinet meeting neih zawh hnu lawkah minister 24-in an bânna hi an thehlut zui a ni.
Reddy-a chiah cabinet member a awm tawh a, ani hian an bânna thehluhte hi a lo dawng a ni.
Reddy-a hian a term hun chanve-ah a cabinet a siksawi dawn tih a lo sawi lawk tawh a. A hun pangngai chu December kha a ni tawh zawk a, Covid-19 leng avangin tihkhawtlai a ni zawk nia sawi a ni.
Cabinet siksawi turah hian minister \ang lai pakhat emaw, pahnih emaw bak an awm zui dawn lo nia sawi a ni.
Cabinet din thar turah hian tun hnaia district 26 siam thar a\angin an tel kim vek dawn nia sawi a awm bawk a. Chi, awmna hmun, sakhua, hmeichhia leh mipa inpawlh takin, June, 2019-a Reddy-a a chief minister tirha mi ang bawk khan an kalpui leh dawn nia sawi a ni bawk.
Reddy-a hian deputy chief minister panga a nei \hin a, heng mite hi Scheduled Caste, Scheduled Tribe, Backward Class, Kapu caste leh Muslim pakhat \heuh an ni a. A cabinet-ah hmeichhia pathum an awm a, home minister pawh M Sucharita niin Dalit hnam, hmeichhia a ni a. Hetiang bawk hian a tharah pawh a kalpui rin a ni.
Minister kal chhuakte hi an party-ah nasa zawkin an inhmang dawn nia sawi a ni a. Minister an nih chhunga vantlangin an hnathawh dan an hmuh dan report siamin anmahni \heuh pawh sawipui an ni dawn a, hei hi thawhhona a \hat zel zawkna tura an tih nia sawi a ni bawk.
Tun \um hi Andhra Pradesh chanchina term laklawka cabinet member zawng zawng an bân vawi hnihna a ni tawh.
Kum 2019-a Andhra Pradesh inthlana an chak hnu lawkah khan Reddy-a hian term laihawlah kum 2024 inthlan thlirin a team a siksawi dawn thu a lo sawi tawh a. Hei hi tute pawhin sorkara chanvo an neih ve theih nan leh minister-te ninna a awm lohna tura tih a ni.
ruahmanna
Reddy-a ho hian Ningani chawhma khan cabinet hi Amaravati-a state secretariat-ah darkar thum thukhawmin a hnuah a minister 24-te hian chief minister hnenah hian an bânna an thehlut.
YSR Congress Party chief ni bawk, Reddy-a hian minister-ten bânna an thehluhte chu zanah Governor Biswabhushan Harichandan hnenah a pe nghal a, he chanchin ziah lai hian la pawmpui lo mah se a pawm rin a ni.
Information & public relations minister kal chhuak ni ta, Perni Venkatramaiah chuan an bânna chu chief minister hova an rel niin kum 2024 inthlan thlira an party tihchakna tur a nih thu a sawi a. “Chief minister thutlukna hi lawm takin cabinet pumin kan pawm vek a ni,” a ti.
Civil supplies minister kal chhuak ni ta, Kodali Nani chuan chief minister hian a cabinet thar tur chu April 11-ah a siam tur thu leh tuna minister bâng ta zinga panga paruk vel bak chu mi thar vek an nih tur thu a sawi.
Nani chuan chief minister thutlukna a pawm thu leh Reddy-a’n ti tura a tih apiang chu lawm taka a tih zel tur thu a sawi a. “Reddy-a sipai rinawm ka nih angin party tan ka thawk dawn a, minister ka ni emaw, ni lo emaw, a dang chuang lo,” a ti.