Manchester United chuan an manager thar tur an zawnna kawngah an mi duh tak an hmu tawh a, Ajax head coach ni lai Erik ten Hag chu an manager thar ni turin an tifel thuai dawn.
Old Trafford a club hotute lamin Ole Gunnar Solskjaer thlaktu nghet ni tur zawnna hi zawh fel a la ni lova, inremna engmah la awm lovin engkim tihfel a la nih loh thu sawi nawn leh \hin mahse United chhungah hian Ten Hag hi an manager thar ni tura an duh ber niin an ngai.
Chiang zawkin
BBC Sport chuan United hian an manager thar atan Ten Hag leh Mauricio Pochettino te chu an thlitfim hnua an buk tawn a nih thu an sawi a. United lam hian club inrelbawl dan leh inenkawl dana kalphung thar siam an tumna kawngah Ten Hag hi an ruahmanna mil zawk a nih an ring.
United hian tunah football director atan John Murtough an nei a, Darren Fletcher chu technical director niin tuna an interim coach Ralf Rangnick chu advisor in a awm dawn bawk a. German football a club inenkawl dan phung entawn telin hei hi Germany a hnathawk tawh \hin Ten Hag mil zawk turin an ngai.
United hian manager thar lakluh chungchang erawh an puang chiang mai dawn lova, a chhan chu Ajax hian Eredivisie-ah PSV Eindhoven nen champion inchuhin an intlansiak mek avangin Ajax lakah zahawm taka chet an duh. Ajax chief executive hi United goalkeeper ropui \hin Edwin van der Sar a nih bawk avangin club pahnih inkara inbiakna a kaltluang niin an ngai.
Engtin zel?
Kum 52 mi Ten Hag hian kum 2017 December a\angin Ajax hi a enkawl tawh a, match 208 a\angin vawi 154 a chakpui tawh a, trophy panga lakpui tawhin UEFA Champions League-ah Ajax kum 2018–19 khan semi-final a hruai thleng.
United-ah hian hna a thawh chuan a coaching staff-ah United player emaw coach hlui a telh dawn nia ngaihna a awm a. Hei hi Solskjaer hnuaia coaching staff a awm, tuna club a la awm chhun Mike Phelan chu a chhuah a rinawm tawh avang a ni.
Hetihlai hian hmun \henkhatah chuan kum 2007 a\anga 2013 chhunga Sir Alex Ferguson-a’n technical development coach atana a hman Rene Meulensteen hming sawi rik a ni bawk.
United hian Ten Hag hi an lakluh fel chuan Ajax hnenah Pound maktaduai 1.7 vel compensation an pe dawn a. PSG a\angin Pochettino lalut dawn se Pound maktaduai 15 vel a ngaih dawn avangin Dutch buk ti rittu niin an sawi bawk.