Indian Army-a a luh ngei theih nan, kum 24 mi, Suresh Bhinchar chu km 350 zet tlanin Delhi a thleng a, sorkar laipui chu sipai lakna huaihawt leh turin a kar.
Tawnzau var nena inthuam, India Hnam Puanzar kengin darkar 48 chuang chhungin Sikar, Rajasthan atangin New Delhi hi a thleng a ni.
Bhinchar-a thil tih hi Twitter-ah Rajasthan Chief Minister Ashok Gehlot-a’n a tihlan atanga darh a ni a. Amah hi Nawa khua, Nagaur district-a cheng a ni.
Rajasthan chief minister chuan sorkar laipui chu hmun ruakte hnawh khah a nih nan sipai lak rûnpui huaihawt vat turin a ti a. “Nagaur khua, Suresh Bhinchar-a hian Sikar atanga Delhi thleng, km 300 chuang tlanin sorkar laipui mit a laa sipai lak a huaihawt theih nan a ti a. Thla hmasa khan defence minister hnenah pawh lehkha ziakin kum hnih zet lak tawh loh sipai la turin ka ngen a ni,” tiin Gehlot-a hian Twitter-ah a tar lang.
“Sipaiah hmun ruak nuai chuang a awm a. Sorkar laipui hian sipai lak runpui hi a hma thei ang berin a huaihawt ngei tur a ni,” tiin chief minister hian a tar lang bawk.
Gehlot-a hian Bhinchar-a chu Sikar atang hian Delhi-ah hian lungawi lohna leh nawrnaa tel turin a kal tih a sawi bawk a. Sorkar laipui chu sipai la tura nawrna huaihawt tum a ni.
Bhinchar chuan a zinkawngah hian, “Kum sarih liam ta chhung khan vawi tam tak ka intlar a; mahse, medical-ah ka tla zel a. Luh dan pangngaia lut turin Covid-19 avanga kum hnih lak a nih tawh loh avangin kum 23 ka pel tawh a ni,” a ti a. Territorial Army hi kum 18 leh 42 inkar luh theih a nih thung thu a sawi bawk.
Kum 2018-a Nagaur-a sipai lakah khan metre 1,600 tlan chu record siamin minute 4.35-ah a thleng tih a sawi a; mahse, medical-ah a tla tih a sawi.
“Indian army-a tan hi ka duh ber a ni a. Milkha Singh anga sipai niha ram rawngbawl ka duh a ni,” a ti.
Lo neitu chhungkua, Bhinchar-a hi unau pariat zinga mi a ni a. District collector-te hnenah a memorandum vawi tam a thehlut tawh a; mahse, hengte hian awmzia a neih loh avangin tuna mi ang hian a che ta tih a sawi.
“Ka nu leh pain an phal lo va, khua a lum em em a, a hla bawk si a. Ka patea fapa hi sipai a ni a, ka thian a ni a, ani hian min inbuatsaihpui a ni,” a ti.
“March 29 zan dar 9:00-ah chhuakin Delhi hi April 2 chawhnu dar 1:00-ah ka thleng a. Ni khatah km 70 vel ka tlan a ni,” a ti.
Delhi a thlen hian Nagaur MP Hanuman Beniwal hmuin Parliament-ah a tih dan chu a sawi chhuahsak a. April 5 khan Jantar Mantar-ah sipaia tan tum, lak hun awm thei si lo duh lohna lantirnaah a tel.
Bhinchar-a tlan hi social media-ah pawh a darh nasa hle.