Tripura-a BJP kaihhruai sorkara tel pakhat, IPFT chuan Tripura Tribal Areas Autonomous District Council (TTAADC) huam chhungah Triplaland state hran ngiatin darkar 24 awh bandh an huaihawt dawn.
Indigenous Peoples Front of Tripura (IPFT)-in band an huaihawt hi ram leilungfate tana Tripraland phutna an thlawpna tihlanna a ni.
TTAADC inthlan a hnai mek a, IPFT hian state hran ngiatna hi a tlangaupui nasa lehzual mek.
Nimina Agartala Press Club-a thuthar lakhawmtute a kawmnaah IPFT thupuangtu, Mangal Debbarma chuan ADC huam chhunga bandh an huaihawt tur hi puangin October 15 zing dar 6:00 atanga a tuk zing dar 6:00 thleng awh tur a ni ang.
Debbarma chuan, “Darkar 24 awh bandh hi Tripraland neih phutna thlawp nana huaihawt tur a ni,” a ti.
Thuthar lakhawmtute hnenah hian high-level modality committee-in socio-economic, cultural & linguistic issues-a an thil hmuhte tihchhuah an phut bawk tih a sawi.
Debbarma chuan bandh hi ram danpuia ADC thuneihna sang zawk pek theihna dan tihbelh (amend) a nih phuta huaihawt an ni bawk tih a sawi.
IPFT leh BJP hian 2018 Tripura Assembly inthlan kha tanghovin an chuh a, sorkarna pawh an siam a. An duh ber chu state hran, Tripraland neih a ni.
Hetih lai hian an thawhpui, BJP chuan an thil phut erawh a ngaihvensak lovin tihhlawhtlin tumna a nei lem lo.
Tripura-ah hian ADC inthlan a hnai mek zel a, tlangramah chuan boruak a sang mek zel a. Tuna TTAADC term kal mek hi May 17-a zo tawh tur kha a ni a; mahse, COVID-19 avangin inthlan theih a ni rih lo.