Aizawl : Health & Family Welfare Board Vice Chairman Dr. ZR Thiamsanga, MLA chuan, Mizoram state health care scheme (MSHCS) Central healthcare leh state health care a in ang lo tih a sawi a, MSHCS bill ba te chu bat hlen a ni dawn lo a, rulh vek a ni dawn tih a sawi.
He thu hi nimina Mizo Hnam Runa Chhung Inkhawm-ah a sawi a, Dr Thiamsanga chuan, Central healthcare chu PM-JAY (Golden Card) a nih thu leh Rs nuai 5 thleng bill theihna PMJAY chu state dangte pawhin an kalpui a, Mizoram pawhin an kalpui reng tih a sawi a, “State health care scheme erawh Pu Zoramthanga’n MNF ministry hmasa hunlai, state dangten tih nachang an hriat ve hmaa a ngaihtuah chhuah leh bultan liau liau a ni,” a ti.
MSHCS bultan nan a tirah sum Bawmpui (Corpus Fund) a Rs. Vbc 50 dah nghal a ni a, kum 2008 khan Asian Development Bank (ADB) loan a dil a. Kum 2009-ah loan Rs. vbc 117 hmuh a ni a, hetih hunah hian Congress Sorkar a lo piang tawh tih a sawi a, Congress sorkarin kum 10 chhung khan corpus fund atan cheng khat mah an dah lova, healthcare chu sawi ngam tur an nih loh thu a sawi.
Dr Thiamsanga chuan, tuna sorkarna an chan leh hnuah health care sum bawmpuiah Rs vbc 50 dahin healthcare kalpui nghal a ni a, kum tin sum bawmpuiah vaibelchhe 50 hi dah ziah tum a nih laiin hripui leng a, an ruahman anga an kal theih tak loh thu a sawi a, “State health care bul tan tirah mi sing 5 vel chauh in ziak lut an awm laiin, tunah chuan mi nuai 1 sing 6 chuang an in ziak lut tawh,” a ti.
Covid-19 leng lo sela chuan healh care bill ah ba an nei lo ang tih Dr Thiamsanga chuan a sawi a, “Hri leng avangin harsatna kan tawk a, bill-tu kan tam tak em avangin ba nei lo thei kan ni lo,” a ti a, bill ba te chu sorkarin a ba hlen dawn lo a, an rulh chhoh mek thu leh, an rul vek dawn tih a sawi.
Health care atan hian MLA te pawhin an hlawh atanga zaa 1 theuh an thawhkhawm thin thu leh,Healthcare enrollment fee tlingkhawm chu cheng vaibelchhe 8 vel a nih thu te, staff enkawl nan Rs vbc 4 vel sen a ni tih leh kum khata health care atana sum mamawh hi Rs vbc 200 vel a nih thu a sawi bawk a ni.