Japan ram chuan India rama coronavirus laka invenna damdawi hman lar tak, Bharat Biotech-in a siam, Covaxin chu a vaccine pawm zingah a telh thar veleh ta.
Hetianga a pawm takah chuan he damdawi hmanga invengte chu an ram chhunga zin pawh a phalsak dawn tihna a ni a, ram pahnih intlawhpawh pawh a tam zual theih phah dawn a ni.
“Japan sorkar chuan Bharat Biotech-in a siam, Covaxin chu recognised vaccine zingah a telh thar ta a, heti a nih chuan India atang pawhin April 10, 2022 atangin he damdawi hmangtute chu Japan-ah an lut thei tawh dawn a ni,” tiin damdawi siamtu company hian Zirtawpni khan Twitter-ah an tar lang a ni.
A hmain ram dang eng emaw zatin Covaxin hi an lo pawm tawh a, heng zingah hian Australia pawh a tel a ni.
Coronavirus leng avang hian khualzinte an buai hle a. India hian vaccine chi hrang hrang a nei a, hengte hi ram chhungah pawm ringawt mah se zinna tur ramin a rintlak tawk tia an lo pawm ve phawt loh chuan zin dawna invenna la la lo ang chiah niin an thlen hnua inkhung hran, endik leh dan zawm tur tam tak a awm thin a. Hei hian inzinpawh a tibuaithlak hle a khualzinna (tourism)-in a tawrh phah hle a ni.