- Hmaa Hauzel
Kum 1986 khan Mexico chuan ‘Khawvela en nawm ropui ber’ FIFA World Cup an thleng a. Kum 1982-a indo Argentina leh England te chu quarter-final-ah an intum a, an boruak a lian hle. Khawpui lian Mexico City a Estadio Azteca Stadium-a quarter-final hmuhnawm zetah hian Diego Maradona goal sawi hlawh pahnih hmangin Argentina chuan hnehna pawimawh tak an chang a; Maradona leh a hote hi a vawihnih nan World Cup-ah an champion zui ta nghe nghe.
Inkhel hmuhnawm takah hian minute 51-naah Maradona chuan ‘Goal tenawm ber’ ti hiala an sawi zui tak reng goal a thun a, a kutin a hnek goal. England tantute leh khawvel mipui tam takin ‘goal tenawm ber ti hialin sawi mah se Maradona hi chuan ‘Pathian Kut (hand of God)’ tiin a sawi ve tlat thung. Dik hlel taka goal a thun hi Argentina tana a khelhpuite pawhin lawmpui nachang pawh an hre lawk lo hial a. “Lo tlan vat vat ru, an hrechhuak palh ang e’ tiin a thiante hi goal lawm tura a nawr hial an ngai a ni awm e. Chuan, England lamah minute 51-naa a goal tihluh hi ‘Hand of God’ tiin a lar zui ta reng a ni.
Maradona hian ‘goal tenawm ber’ ang hiala sawi a thun atanga minute li hnu lekah England player te hual vel karah ropui takin a talchhuak a, minute 55-naah goal ropui chungchuang a thun zui leh zat. England player engemaw a bum tlang hnuin si nghak a bum zui leh a, an goal hnihna a thun. Hmahruaina goal kha ‘Goal tenawm ber’ tiin an sawi zui a. England laka an goal hnihna a thun erawh chu ‘Goal of the Century’ ah puan a ni zui ta hial thung. Khami tuma England si nghak Peter Shilton ngei pawh khan kum 2002 khan ‘goal of the Century’ atan hian a vote ve hmak bawk. A goal hnihna hian a mualphona a hliahkhuh hneh rem rem hle.
Si hnih an phurh hnuin England tan Gary Lineker chuan minute 81-naah goal thunin an si phurh a sut then nang a, indona muala an hneh Argentina lakah 2-1 a tlawm in, semi-final an lut zo ta chuang lo.
England lakah goal sawisel hlawh leh goal ropui chungchuang a thun tuma Maradona-a’n a hak kawr (Jersey) hi hralh a ni dawn a. Pound maktaduai li (4) India pawisaa Rs. 397,120,000/- velin hralh theih an inbeisei. Maradona Jersey hi April ni 20 atanga May ni li chhungin lei theih a ni ang. Lei theih hun chhung hian Sotheby’s London showroom-ah a Jersey hi pho lan a ni ang.
Argentina leh England an inkhel zawh khan Maradona leh England midfielder Steve Hodge te chuan kawr an inthleng a. Hodge hian tun thlengin a la hralh miah lova, Manchester khawpuia awm National Football Museum chuan man chawiin an hawh a, kum 20 chhung zet he hmunah hian dah a ni tawh a. April ni 20 atang May ni 4 chhung hian hralh an tum dawn ta a, lei tum pawh an awm nghal nual niin tarlan a ni.