Aizawl : Lunglei North bialtu MLA Dr Vanlaltanpuia’n MNF party tobul leh nihphung hrechiang apiang te MNF party-ah an lut nia sawiin, “An lo lut zel dawn bawk” a ti.
MNF party chhung inkhawm nimina neihah he thu hi Dr Vanlaltanpuia chuan a sawi a. Kum 1961 atanga 1966 velah Mizote chu India sorkarin a la dah pawnlang hle tih sawiin, “Mizote khawvel hriata kan inphochhuah ve theih nan tiin, kum 20 tal tawp harsatna leh hrehawm karah ram an mu a, Pathian hriatpuia penchhuak an nihna chu Pathianin mal a sawm a, India mi hriat kan ni ve ta” tiin, 1986-a Mizoram state a lo pian chung- chang a sawi.
Nationalism chawisan zel a pawimawh thu sawiin, Dr Vanlaltanpuia chuan khawvel ram dang ten Mizoram an hriat ve theihna tura theihtawp chhuah zel a tul thu a sawi a. “Budget te hi kan bihchiana, kan enfel a ngai a. Ram tan thil tha tur kan enfel zel pawh a ngai a ni,” a ti.
Dr Vanlaltanpuia chuan kum 2023 inthlanpuiah Zoram mipui ten MNF an khawngaih leh dawn nia sawiin, “Kan sorkar leh dawn a ni” a ti bawk.