Thenzawl Vengthar Field atanga Horticulture College panna kawngpui kama kangtek thing atangin tun lai hian zan lamah ruah phingphisiau, ruahbing ang maiin a sur thin a, en a hlawh hle.
A hmuna tlawhtu Thenzawla Vantawng Editor Liantluanga Renthlei sawi danin he thing atanga tui lo chhuak hi a tam hle a, a chang phei chuan kawngpuiah tui hawk tlem luang angte pawhin a luang hial niin a bul hnaia awmte chuan an sawi.
He thing hi kangtek thing niin hriat a ni a, a kung, bulthut hi feet hnih leh tlem vela lian niin, a bul atanga feet 20 vel chu a kawrawng a, a sang hle a, a bul atanga a ler thleng hian feet 50 chu a tlin zan rin a ni a. Thing hnah sin lam niin, par tlem a nei a, a par hi a eng (yellow) a ni.
Tunhma lamin hetianga he thing atanga tui a far hi hriat a ni ngai lo a, kar hnih vel liam ta khan a bula chengten he thing hnah ler atanga ruah phingphisiau ang maia tui lo far hi an hmu a. Tun hnai kar hnih vel liam ta atang khan zan tin hetiang hian tui hi a chhuak thin a, a chang chuan a tam viau thin.
Thing atanga tui lo chhuak hi ruah fang lian deuh tak angte a awm bawk a, a tam ber chu ruah hmite sur angin a sur seng seng thin a. Thingkung hnuai feet 20 bial awm vel chu a far huh dup thin a ni.
Vantawng editor-in thing chanchin hre tur deuha ngaih forest officer a biakte chuan thing, tui tichhuak thin chu a awm ngei thu leh a bul vel ramah tui a tam tihna a nih thu sawiin, thing atanga tui far chu a mak hran lo tih a sawi a. Hetiang taka thal lai lehnghala zan tin tui, ruah phingphisiau sur ang maia a sur thin erawh mak an tih thu leh enfiah tham nia an hriat thu an sawi.
He thingkung atanga ruah phingphisiau ang maia tui lo chhuak thin hi, chawlhkar hnih liam ta vel atangin thimhlim atanga in tanin zankhuain ruahphingphisiau ang hian a awm a, khawvar rual velin a reh ve leh mai thin a, tui chhuak hi a tlem ve hret hret niin a bul hnaia awm te chuan an sawi.
Mizoram thingah tui pai chi fartuah leh thing dang thenkhat hnah atanga tui far thin chu mi tlangpuiin an hre vek a, hetiang taka ruahbing leh ruah phingphisiau anga hun eng emaw chen zan tin hmuh tur awm ang erawh thil hriat ngai loh a ni a, mak tih a hlawhin, en pawh a hlawh hle nghe nghe.