Aizawl : ZPM Leader Lalduhoma, MLA, chuan ZPM an sorkar chuan minister te’n ngaihtuah chawp ngai loin an hmalak dan tur ‘road map’ an neih fel thlap tawh tih a sawi.
Lengteng Constituency chhunga Kawlbem, Teikhang, Hrianghmun leh Mimbung khuate Ningania a tlawhnaah thu sawiin Lalduhoma hian, “Party-ah ni loin policy a rinawm turin kan inzirtir a ngai tawh a, party ruihchilhna hian kan ram a tichhe nasa tawh em em a, keini chuan ‘sem policy’ hi tihtawp kan duh a ni,” a ti.
Lalduhoma hian, thingtlang kut hnathawktute tan budget-ah pawisa dah a nih ve ngai loh laiin, ZPM erawh chuan kut hnathawktute thlai chi an inchintir a nih pawhin a tawp an thlenpui dawn tih a sawi a. “Kumtluana risk laa hna inthawhtir hi tihtawp kan duh a, sorkar hnathawkte leh sumdawngte’n an sum thawhchhuah tur rate an hria ang hian kut hnathawktute pawhin kan sum thawhchhuah tur zat kan hre ve tawh dawn a ni,” a ti bawk.
Sorkar hna lak chungchangah pawh an fair tur thu leh MSSSB te hi an sorkar hunah \hiah nghal a nih tur thu sawiin, “A \ha leh tling chu kan la mai dawn a ni,” tiin ZPM Leader hian a sawi.
Thusawitu dang ZPM Consultant F Rodingliana chuan, “ZPM chuan ram tan hmachhawp tam tak kan nei a, kut hnathawktute tan hmachhawp kan nei a, chutiang bawkin sumdawngte tan leh lekhathiam leh thiam lote tan pawh hmachhawp kan nei a ni,” tiin, an sorkar huna ni 100 chhunga tihhlawhtlin tur an duan thu te, kum hnih leh kum nga chhunga tih turte an duan duang fel tawh thu thu sawiin, kum sarih chhungin Mizoram hi intodelhtir an tum tih a sawi bawk.
Khaw hrang hrang a tlawh naah Lalduhoma hian ZPM zawm thar mi eng emaw zat a lawm lut nghal a ni.